Avokati Ravik Gurra, 50-vjeç, u ekzekutua mbrëmjen e së premtes në një lokal në qendër të qytetit të Elbasanit.
Gurra ishte duke pirë kafe me dy persona të tjerë, njëri prej të cilëve zyrtar në një institucion lokal, kur është qëlluar me një plumb në kokë.
Burime policore bëjnë të ditur se krimi ka ndodhur brenda pak sekondash, ndërsa autori i maskuar ka mundur të largohet me shpejtësi.
Ravik Gurra, i njohur si mik dhe avokat i fisit Çapja si dhe avokat i Emiliano Shullazit, ishte një emër i njohur në qytetin e Elbasanit për shkak të profesionit të tij.
Autori dyshohet se ka përdorur një armë me silenciator, për shkak se nuk janë dëgjuar krismat, ndërsa policia ka ngritur grupe të shumta kontrolli dhe postoblloqe.
Pak minuta pas ngjarjesh, jo shumë larg vendit të krimit, policia ka gjetur një automjet duke u djegur, që syhohet se është përdorur për largimin e atentatorit.
Një grup ekspertësh nga Departamenti i Policisë Kriminale në Policisë e Shtetit është nisur menjëherë në ndihmë të grupit hetimor për të bërë të mundur zbardhjen e shpejtë të ngjarjes.
Policia po heton në pistën e vrasjes për shkak të detyrës, ndërsa grupi hetimor po mbledh të dhëna dhe pamje nga kamerat që mbulojnë vendin e ngjarjes.
