Avokati i ekzekutuar në Elbasan mbrëmjen e së premtes kishte pasaportë angleze, veç asaj shqiptare.
Madje sikundër raportohet ditën e shtunë, 23 mars, ai do të udhëtonte drejt Britanisë së Madhe.
Ravik Gurra, 50 vjeç, i cili ishte mbrojtës ligjor i Emiljano Shullazit, por edhe i Çapjave në Elbasan, ndërsa vite më parë kishte mbrojtur Altin Arapin, një prej personave të akuzuar si anëtar i organizatës “Hakmarrja për Drejtësi” bënte një jetë mes Shqipërisë dhe Britanisë së Madhe.
Në momentin e ekzekutimit ai ishte ulur në ambientet e jashtme të një lokali në qendër të qytetit, në prani të dy personave të tjerë.
Autori i krimit, sipas burimeve nga grupi hetimor, është afruar qetësisht, ka qëlluar në kokë avokatin me një pistoletë me silenciator, dhe është larguar ndoshta i ndihmuar nga një person i dytë, me një automjet që dyshohet se është gjetur i djegur.
Fakti se arma ishte me silenciator, shumë prej të pranishmëve në zonën përreth nuk kanë mundur të kuptojnë gjë, pasi krisma nuk është dëgjuar.
Gjithçka është marrë vesh, pasi viktima ka rënë nga karrigia, pa shenja jete.
Nga të dhënat e para mësohet se viktima nuk ka pasur kërcënime apo shqetësime të shprehura te kolegë, familjarë apo të afërm të tij, që janë pyetur nga grupi hetimor.
Drejt Elbasanit ka udhëtuar edhe Drejtori i Policisë së Shtetit, Ardi Veliu, ndërsa prokurorët që po drejtojnë hetimet janë Enkeleda Millonai dhe Petref Asllani. Në ndihmë të tyre do të jetë edhe një grup me specialistë të Krimeve të Rënda, që kanë udhëtuar drejt qytetit të Elbasanit.
