Ish-ministri i Drejtësisë, Ylli Manjani ka reaguar lidhur me situatën politike në vend. Me anë të një statusi në rrjetet sociale Manjani ka thumbuar edhe deputetët e rinj të listave të cilët po futen në kuvend pasi deputetët e opozitës, dorëzuan mandatin.
Me anë të një fotoje të fletës së votimit Manjani shpjegon se votuesit kanë votuar partinë dhe asnjë nga ata deputetët që nuk ja dimë as emrin sipas tij.
“Kjo është fleta e votimit e përdorur në votimet për zgjedhjet parlamentare të vitit 2017.
Pra votuesit kanë zgjedhur partitë jo emrat në listat e tyre!!!
Të vetmit emra që mund të themi se janë zgjedhur janë ato të kryetarëve të partive që janë djathas fletës. Asnjë emër tjetër, po asnjë fare!
Nuk është zgjedhur as Lefter Koka e madje Sali Berisha, Monika Kryemadhi apo Taulant Balla me shokë…. Askush përveç partive dhe kryetarëve të tyre nuk është zgjedhur.
Le pastaj të pretendosh që populli paska zgjedhur fundlistësit Ylli Shehu, Edmond Rrushi, Kujtim Gjuzi, Ralf Gjoni e te tjerë që s’ua dimë as emrat.”,- ka shkruar Manjani.
Më tej Manjani shtonë se ky është sistemi votimit që ne kemi dhe se ligjet përcaktojnë se si zëvendësohen emrat dhe jo partitë në Kuvend.
“Ky është sistemi i votimit që kemi!
Ndaj ato deklaratat e renegatëve që “më ka votuar populli” janë palaçollëk politik e juridik! Le pastaj ata që deklarojnë se “ju ka thënë Amerika dhe Europa…”
E përsëris: ligjet përcaktojnë si zëvendësohen emrat, por jo partitë në Parlament!
Ky është sistemi i partive jo i emrave, për të mirë apo për të keq!”,-ka shkruar ish-ministri.
