Hakmarrja dhe prishja e pazareve të drogës, janë dy pistat që po hetohen nga grupi hetimor lidhur me vrasjen mbrëmjen e së hënës të Jurgen Kurtit, i njohur edhe si menaxheri i VIP-ave.
Burime nga policia bëjnë të ditur se ende nuk ka dyshime për autorët e mundshëm, të cilët duket se i janë ruajtur edhe kamerave në zonë për të mos u identifikuar.
Mësohet se ndaj Kurtit është qëlluar me pistoletë, ndërsa 3 plumba e kanë kapur në trup.
Autorët i kishin zënë pritë të riut poshtë banesës, ndërsa ai kishte dalë nga palestra dhe po kthehej në këmbë.
Hetimet fillimisht u përqëndruan në dy ngjarjet e ndodhur në vitet 2016 dhe 2017, ku emir i Kurtit rezulton i përfshirë.
Në 2016, Kurti u hetua për vrasjen e babait të tij, krim që më pas e mori përsipër daja i viktimës së mbrëmshme.
Një vit më pas, në 2017, Jurgen Kurti u përfshi në një tjetër konflikt, ku viktimë mbeti pronari i një dyqani në Durrës. Në atë kohë policia arrestoi 3 persona, por dënoi vetëm njërin, ndërsa Kurti fitoi sërisht lirinë.
Pikërisht nga këto ngjarje, policia ka hetuar dhe ka marrë në pyetje të paktën 20 persona, mes të cilëve edhe miq të viktimës.
Burimet bëjnë të ditur se këta të fundit janë pyetur nëse kanë pasur dijeni për kërcënime ndaj viktimës, apo që të jenë në dijeni të shqetësimeve të tij në kohët e fundit.
Gjithashtu policia po heton mbi të ardhurat e viktimës, referuar këtu letës së luksit që bënte apo shpenzimeve që kishte.
Pavarësisht se është deklaruar se 26 vjeçari kishte biznese, në sitën e hetimit pritet të kalojnë të ardhurat, nëse bizneset që ai kishte apo fitimet që siguronte e justifikonin apo jo shpenzimet që kryente.
Mbrëmjen e djeshme policia ngriti postoblloqe dhe pika kontrolli në pikat hyrëse dhe dalëse të Tiranës, por pa mundur të ndalonte të dyshuar lidhur me ngjarjen.
Kurti banonte në zonën pranë stadiumit “Selman Stërmasi”, një zonë mjaft e frekuentuar dhe me lëvizje të madhe.
