Një 41-vjeçar me iniciale B.S. është arrestuar nga Policia e Elbasanit në një lokal në lagjen “Viserian Xhuvani”. Sipas informacioneve policore, menaxheri i lokalit ishte përfshirë në konflikt me një klient.
Gjatë sherrit, 41-vjeçari kishte qëlluar me armë në ajër dhe tentoi të largohej dhe hodhi pistoletën në tokë në momentin që policia shkoi në vendngjarje.
Uniformat blu ndërhynë menjëherë duke arrestuar 41-vjeçarin, i cili akuzohet për armëmbajtje pa leje dhe prishje të rendit e qetësisë publike. Në vendngjarje u gjet dhe u sekuestrua një gëzhojë dhe pistoleta.
Njoftimi i policise
Arrestohet në flagrancë nga Policia një 41 vjeçar, i cili ka qëlluar me armë zjarri në ajër dhe në momentin që ka mbritur Policia, ka tentuar të largohet nga vendi i ngjarjes duke hedhur armën e zjarrit në tokë.
Në Sallën Operative të Komisariatit të Policisë Elbasan, ka ardhur një telefonatë se në lagjen “Viserian Xhuvani”, Elbasan, po ndodh një konflikt në një lokal ku janë dëgjuar dhe të shtëna me armë.
Menjëherë në drejtim të vendngjarjes kanë shkuar shërbimet e policisë, ku falë reagimit të shpejtë të mirëorganizuar, kanë bërë të mundur arrestimin në flagrancë të shtetasit: B.S., 41 vjeç, banues në Elbasan.
Në cilësinë e provës materiale u sekuestruan një armë e zjarri pistolet, si dhe një gëzhojë.
Materialet i kaluan Prokurorisë pranë Gjykatës së Shkallës Parë Elbasan, për veprat penale. “Mbajtja pa leje dhe prodhimi i armëve, armëve shpërthyese dhe i municionit” dhe “Prishja e qetësisë publike”.
