Lideri historik i socialistëve, Fatos Nano, ka pranuar ftesën për të qenë pjesëmarrës në kongresin e PS, ku pritet të formalizohen edhe kandidatët për kryebashkiak.
Nano po rikthehet pas shumë vitesh si një lider i atyre që sot nuk janë më pjesë e Rilindjes, madje vështirë se mund të qasen në partinë që sot drejtohet nga Edi Rama. Të vetmit që Nano mund të njohë në sallë janë Gramoz Ruçi dhe Pandeli Majko, që për një arsye ose një tjetër mbijetuan nga fshesa e Rilindjes.
Shumë prej atyre që ishin bashkëpunëtorë, miq apo armiq të liderit historik të socialistëve, sot janë më shumë se të padëshiruar nga 99 apo Mjaftistët që mbushën boshllëkun në partinë që mban siglat e PS, por që s’ka lidhje me atë që drejtonte dikur Fatos Nano. Ky i fundit mund të shfaqet si një gomone shpëtimi për Partinë Socialiste, por vështirë që ndonjë fjalim i tij të ngjisë te Rilindja. Dikur Nano fliste për progresistë e socialistë, që sot nuk i gjen jo më në radhët e PS, por edhe si togfjalësh është fshirë në leksikun politik të atyre që përfaqësojnë Rilindjen.
Nano do ti drejtohet një salle me njerëz që në 2.004 dirigjonin protestat kundër tij, Erjon Veliaj apo Elisa Spiropali, apo të tjerë që idhullin e tyre kanë Edi Ramën që herë e quajnë Skënderbe dhe herë shpëtimtar. Nano mund të duartrokitet me urdhër, por në fakt edhe ai vetë e di që ambienti ku do të ulet, është i njëjti që refuzonte dhe përbuzte kandidaturën e tij për President. Nano e di fare mirë që përballë tij do të qëndrojnë jo progresistët apo socialistët, por një sekt që fshiu çdo gjurmë të tij, apo çdokënd që guxonte dhe të bënte krahasime mes tij dhe kreut aktual.
Ndaj dhe Nano në kongresin e PS do të jetë një i huaj ose emigrant që vështirë se mund të përshtatet, pavarësisht viteve që ka në kurriz apo eksperiencës politike. Ai mund të ndjehet mirë që pas shumë vitesh e ftojnë në partinë që ka drejtuar, që mund të shtrëngojë duart me Ruçin, Majkon, Ulqinin si bashkudhëtare, mund të falenderohet nga Rama për kontributin e tij, por që do të përbuzet dhe përqeshet nga shumica që sot quhen Rilindas dhe bëhen keq po ti thuash socialistë. /Boldnews.al/
