Policia e Tiranës ka ndaluar 14 persona, pas protestës së djeshme të opozitës. Ata akuzohen se kanë ushtruar dhunë ndaj efektivëve të policisë, duke përdorur sende të forta.
Mësohet se arrestimet janë kryer pas kqyrjes së kamerave të sigurisë, ku janë evidentuar 14 persona që kanë qëlluar në drejtim të forcave të rendit, gjatë përplasjes mes tyre dhe policisë pranë godinës së Parlamentit.
Ndërkaq mësohet se grupi hetimor i ngritur për këtë rast po vijon analizimin e pamjeve filmike të siguruara nga kamerat e vendosura para Parlamentit.
Gjithashtu vijojnë shoqërimet dhe verifikimet edhe nga policitë në qarqe.
Mësohet se kreu i degës së PD-së në Fier, Luan Baçi, dhe djali i tij, po hetohen në gjendje të lirë.
Mijëra qytetarë protestuan dje kundër qeverisë Rama, në një tubim që zgjati pothuajse 5 orë dhe që tërhoqi vëmendjen e mediave ndërkombëtare.
Incidentet apo përplasjet mes protestuesve dhe policisë u shënuan te Parlamenti, ndërsa forcat speciale përdorën gazin lotsjellës dhe ujin me presion kundër protestuesve.
Policia raportoi se 3 punonjës policie pësuan dëmtime, por pa iu rrezikuar jeta. Ndërkohë me dhjetra qytetarë mbetën të dëmtuar si pasojë e gazit dhe presionit nga uji.
