Disa mijëra qytetarë janë nisur drejt Tiranës për t’iu bashkuar protestës së opozitës, e cila pritet të jetë ndër më të mëdhatë në 28 vitet e fundit.
Sipas drejtuesve të opozitës, protesta do të jetë paqësore, ndërsa nuk jepen detaje mbi kohëzgjatjen e saj.
Lulzim Basha, kryetar i PD-së, po zhvillon një mbledhje në selinë e PD-së, me anëtarë të kryesisë dhe ish-deputetët demokratë, mbi skenarët e mundshëm që do të aplikohen gjatë protestës.
E njëjta gjë po ndodh edhe në selinë e LSI-së, ku Monika Kryemadhi prej orës 08:00 ka nisur diskutimet me drejtues të kësaj partie.
Opozita kërkoi një leje 48 orëshe nga policia për zhvillimin e protestës, ndërsa leja që i është dhënë ka qenë deri në mesnatën e sotme, ora 00:00.
Protestuesit kanë nisur të grumbullohen në pika të ndryshme të Tiranës, ku përqnëdrimi më i madh është në sheshin Skënderbej.
Gjithashtu në selinë e PD-së janë mbledhur mbështetës të kësaj partie, nga ku do të nisë edhe marshimi për nisjen e protestës.
Protestuesit do të ecin përgjatë bulevardit nga pika të ndryshme, ndërsa kreu demokrat Lulzim Basha do të përshkruajë rrugën nga selia e PD përgjatë unazës për t’iu bashkuar protestuesve te ura në bulevardin “Dëshmorët e Kombit.
Gjithashtu qytetarët kanë nisur ti drejtohen bulevardit “Dëshmorët e Kombit”, atje kun ë orën 11:00 pritet të nisë edhe protesta qytetare, e drejtuar nga opozita.
Forcat e policisë ndodhen në gadishmëri dhe tashmë janë marrë masat për mbrojtjen e godinës së Kryeministrisë.
Mbi 1600 policë janë angazhuar, nga të cilët 1300 ndodhen pranë godinës së Kryeministrisë.
