Një plagosje me armë zjarri është shënuar në Bulqizë këtë të premte, te “Ura e Çerenecit”.
Mësohet se një i plagosur ka mbetur Mirdash Osmani, i cili është transportuar në spital dhe sipas mjekëve, ndodhet jashtë rrezikut për jetën. Personi që shkrepi këmbëzën e armës është Blerim Skara, i cili është shpallur në kërkim policor.
“Rreth orës 16.30, në vendin e quajtur Ura e Çerenecit, dyshohet se shtetasi B.S, pas një konflikti për motive të dobëta ka plagosur me armë zjarri shtetasin M.O, i cili po merr ndihmë mjekësore në spitalin e Peshkopisë dhe ndodhet jashtë rrezikut për jetën. Autori i dyshuar pas ngjarjes është larguar dhe shërbimet e policisë po punojnë për kapjen e tij. Grupi hetimor vijon hetimet në vendngjarje, për zbardhjen e plotë të rrethanave të ngjarjes”, njoftoi Policia e Dibrës.
Në vitin 2015, Osmani u arrestua pasi dyshohej se kishte porositur 3 vrarës me pagesë për të ekzekutuar një 20-vjeçar, me të cilin dyshohej se kishte pasur konflikte.
“Ndalimi i tij u bë pasi Gjykata e Dibrës kishte dhënë masën e sigurisë ‘Arrest me burg’ si autor i dyshuar për vrasje me paramendim të mbetur në tentativë, kryer në bashkëpunim.
Më datën 10 nëntor të vitit 2014 Mirdash Osmani ka porositur tre vrasës me pagesë me inicialet B.L, L.XH dhe V. C, për të ekzekutuar shtetasin F.A. Falë ndërhyrjes në kohë të policisë së Bulqizës vrasësit me pagesë janë neutralizuar dhe janë arrestuar në flagrancë”, njoftoi Policia asokohe. /BN/
