Kuvendi do të mblidhet sot në seancë plenare, ku pritet që të betohen edhe 5 deputetë të rinj, që kanë hyrë në Kuvend nga listat e PD dhe LSI, pas dorëzimit të mandateve nga ligjvënësit e këtyre partive.
Kështu në seancë pritet të betohen Elda Hoti, Erdiola Braha dhe Edlira Hyseni, përfaqësues të LSI-së, si dhe Lefter Maliqi dhe Majlinda Halilaj të PD-së.
Zyra e shtypit e Kuvendit bëri të ditur se Këshilli i Rregullores, Mandatet dhe Imunitetin ishte shprehur pro shkresave të dërguara nga KQZ-ja, e cila rekomandonte dhënien e mandatit të deputetit për pesë kandidatët.
Ndërkohë përsa i takon mandateve të Ligoraq Karamelos dhe Alban Zenelit, të dy kandidatë të PD-së, pritet mbledhja e Këshillit për Rregulloren, Mandatet dhe Imunitetet, ndërkohë që KQZ ka shpallur vlefshmërinë e tyre.
Nga momenti që deputetët e PD dhe LSI dorëzuan mandatet e deputetëve me përjashtim të Myslim Murrizit, Rudina Hajdarit dhe Lefter Kokës, numri i kandidatëve që kanë pranuar të plotësojnë vakancën ka arritur në 11.
