Opozita ka paralajmëruar zhvillimin e një proteste masive më 16 mars, tubimi i tretë i madh që zhvillohet prej 16 shkurtit me kërkesën e largimit të Edi Ramës nga posti i kryeministrit dhe krijimit të të qeverie tranzitore.
E ndërsa kreu demokrat Lulzim Basha ka nisur një tur në rrethe, duke aplikuar skemën e takimeve derë më derë, ish-deputetët demokratë, anëtarët e Kryesisë dhe të Këshillit Kombëtar, janë angazhuar në takimet me strukturat partiake.
Vëmedja është përqëndruar në degët më të mëdha, ku veç Tiranës përfshihen edhe Durrësi, Shkodra, Lezha, Fieri, Elbasani, Korça, të cilat priten të kenë edhe pjesëmarrjen më të lartë.
Nga strukturat e PD-së po kërkohet organizimi qytetarëve sipas zonave që ata mbulojnë, duke synuar një masivitet maksimal në tubimin e 16 marsit.
“Duhet masivitet, një bashkim qytetarësh pa dallim kundër të keqes që ka zaptuar vendin”, është porosia që të gjithë të deleguarit e qendrës së PD-së kërkojnë nga strukturat në bazë.
Protesta e 16 marsit është konsideruar si një test i rëndësishëm për opozitën, e cila ka dorëzuar mandatet e deputetëve, duke marrë një vendim ekstrem i paaplikuar më parë, ndërsa po udhëheq protestat qytetare.
Dy protesta të opozitës janë zhvilluar para Kuvendit të Shqipërisë, ndërsa ky i fundit është mbledhur në seancë plenare, ndërsa seria e protestave nisi më 16 shkurt para godinës së Qeverisë.
Ndërkohë në disa qytete të vendit janë organizuar protesta, sa herë që Kryeministri Rama paralajmëronte apo kishte programuar takime në kuadrin e turit “Bashkia që duam”.
Protesta e fundit kundër Ramës është ajo e zhvilluar në Fier 4 ditë më parë, ndërsa policia shoqëroi dhjetra persona me akuzën e tubimit të paligjshëm.
Rama po përpiqet të trajtojë situatën jo si një krizë politike apo revolt popullore, por si një lëvizje të establishmentit, duke nënkuptuar këtu opozitën. /BN/
