Mbyllet pa vendim vettingu i Marsida Xhaferllarit, çfarë vendosi KPK

Shumica e trupës gjykuese arsyetoi se Marsida Xhaferllari, e cila mban postin e Kryeinspektores pranë Inspektoriatit të ish-KLD, kishte humbur statusin e magjistratit dhe se për këtë KPK nuk mund të vendoste konfirmimin ose jo të saj.

Pasi hetoi në të tre kriteret dhe mbajti një seancë të gjatë dëgjimore me Marsida Xhaferllarin, Komisioni i Pavarur i Kualifikimit njoftoi të hënën se nuk mund të merrte një vendim në rastin e saj.

“Trupa gjykuese me shumicë votash vendosi të deklarojë të përfunduar procesin e rivlerësimit kalimtar të subjektit Marsida Xhaferllari, pa një vendim përfundimtar për çështjen, për shkak se objekti për të cilin ka nisur procedura është bërë e pamundur”, tha kryesuesja Firdes Shuli gjatë seancës së njoftimit të vendimit.

Sipas vendimit të shpallur të KPK Xhaferllari kishte humbur statusin e magjistratit dhe për rrjedhojë nuk mund të vendosej për të njësoj si për subjektet e tjera.

Xhaferllari la të kuptohej se do e kundërshtonte këtë vendim. “Unë pretendoj që i kam dhënë të gjitha argumentet për konfirmimin në detyrë”, tha ajo. Ndërkohë që shtoi se nuk do të diskutonte arsyet e vendimit jashtë sallës ku u bë shqyrtimi.

Dosja ndaj Xhaferllarit u shqyrtuar nga një treshe e kryesuar prej Firdes Shulit, me anëtare Xhensila Pine dhe relator Roland Ilia. Kandidate për të marrë postin e Inspektorit të Lartë të Drejtësisë, por edhe për një nga vendet vakante në Gjykatën Kushtetuese, Xhaferllari u gjet sipas relacionit pa probleme në kriterin e pasurisë dhe atë të pastërtisë së figurës.

Megjithatë, relatori i çështjes vuri në dukje se Operacioni Ndërkombëtar i Monitorimit (ONM) kishte ngritur disa çështje sa i përket kriterit të profesionalizmit, përfshi edhe dyshimet nëse Xhaferllari kishte apo jo statusin e magjistratit.

Xhaferllari e ka filluar karrierën si gjyqtare në Gjykatën e Rrethit Gjyqësor Fier, ku ka shërbyer nga viti 1999 deri në vitin 2007. Në periudhën dhjetor 2007 deri në shtator 2008, ajo ka punuar si këshilltare e Ministrit të Drejtësisë dhe nga shtatori 2008 e deri në janar 2013, si drejtore në Drejtorinë e Kodifikimit si dhe Drejtorinë e Përgjithshme të Çështjeve të Drejtësisë në Ministrinë e Drejtësisë. Në vitin 2013, Xhaferllari u emëruar Kryeinspektore në Këshillin e Lartë të Drejtësisë, një post që ajo e ka mbajtur deri zëvendësimin e KLD-së me Këshillin e Lartë Gjyqësor.

Vendimi për të mos marrë vendim është i pari i kësaj natyre nga KPK. Në arsyetimin e shkurtuar të lexuar në sallë shumica njoftoi se kishte arritur në përfundimin se “subjekti ka humbur statusin e gjyqtarit”.

Sipas KPK Xhaferllari duhej t’i ishte nënshtruar testimit pranë Shkollës së Magjistraturës gjë që siç doli nga hetimi administrativ nuk ishte berë. Shumica u shpreh se për subjektet pa status magjistrati ky testim ishte i detyrueshëm të merrej në konsideratë nga Komisioni. “Trupa gjendet në pamundësi të realizojë rivlerësimin kalimtar të subjektit Marsida Xhaferllari”, u shpreh kryesuesja.

Gjatë seancës dëgjimore një pjesë e mirë e saj u fokusua në argumentet e KPK dhe Xhaferllarit mbi çështjen e statusit. KPK dhe ONM shprehën dyshime nëse ajo ishte ende gjykatëse. Megjithatë Xhaferllari këmbënguli se gëzonte statusin e magjistrates, duke qenë se ligji i aplikuar kur ajo kishte lënë punën si gjykatëse për një vend në Ministrinë e Drejtësisë, nuk kishte parashikime për humbjen e këtij statusi.

Pyetjes së vëzhguesit ndërkombëtar dhe shqetësimit të tij për shkëputjen për një kohë të gjatë nga sistemi i drejtësisë, Xhaferllari iu përgjigj duke thënë se nuk ishte shkëputur asnjëherë dhe se puna që kishte bërë kishte qenë gjithmonë e lidhur me drejtësinë. /Reporter.al/

PËRGJIGJU

Please enter your comment!
Please enter your name here