Boldnews.al
Shefi i Sektorit për Krimet në Drejtorinë e Policisë së Tiranës do të drejtojë DVPT, deri në emërimin e të zgjedhurit të ri. Burime thanë se Elton Alushi do të drejtojë Drejtorinë e Policisë së Tiranës, pas refuzimit nga ana e Dhimitraq Ziut.
Pas largimit të Kastriot Skënderajt, Elton Alushi dhe Dhimitraq Ziu janë komanduar drejtues të policisë së Tiranës. Alushi është emëruar zv/Drejtor zyrtarisht.
Mësohet se Ziu, i cili ka qenë dhe më herët drejtor i komanduar i DVPT, ka refuzuar të bëjë sërish të njëjtin rol, duke kërkuar emërim dhe jo komandim. Në këto kushte, drejtoria mund të drejtohet nga Alushi, zyrtarisht i emëruar zv/drejtor, deri ne emërimin e drejtorit te ri.
Alushi u pezullua nga detyra e shefit të komisariatit numër 1 në kryeqytet, në vitin 2017, për shkak se lejoi ndërtimin e një objekti pa leje në Rrugën e Elbasanit. Më pas, u emërua shef krimesh në DVPT.
Këtë të hënë, ka pasur një mbledhje mes ministrit të Brendshëm Sandër Lleshaj, Drejtorit të Policisë së Shtetit, Ardi Veliu dhe Muhamet Rrumbullakut, drejtorit të SHÇBA-së.
