Pas një jave pushim, për shkak të bojkotit nga ana e Shoqatës së Arbitrave, Kategoria Superiore duket se do të rikthehet në fundjavë. Do të luhet java e 25-të e kampionatit dhe risia është se nga tani zhvillohen vetëm katër përballje, situatë e krijuar pas përjashtimit të Kamzës nga kampionati. Duke qenë se në mesjavë ka Kupë, do të luhet Superiorja dy ditë në fundjavë.
Gjithçka nis me përballjen Skënderbeu-Kukësi, që zhvillohet të shtunën në Korçë prej orës 17:00. Të dielën dy sfida luhen në orën 14:00. Në Laç vendasit presin Flamurtarin, kurse Kastrioti do të luajë me Tiranën. Ndeshja me shumë mundësi do të luhet në Durrës, për shkak se krutanët janë të dënuar.
Java e 25-të mbyllet me një takim mjaft interesant, Partizani i vendit të parë zbret në fushë dhe synon të mundë Teutën, aktualisht e treta në klasifikim. Durrsakët duan Europën dhe do tentojnë të mos dalin pa pikë.
