Autoriteti Rrugor Shqiptar ka bërë me dije se ka mbyllur një nga urat në vend, për shkak të rrezikut nga shembja.
Bëhet fjalë për urën e vjetër automobilistike në aksin e kryqëzimit Cerme-Rrogozhine mbi lumin Shkumbin, e cila paraqet probleme konstruktive në themelet e saj.
Identifikimi i problematikave në këtë urë, u bë pas një Inspektimi dhe kontrolli që ARRSH u bëri urave të vjetra, të cilat janë bërë rast denoncimi nga qytetarët për shkak të amortizimit që kanë pësuar në vite.
‘Ura e vjetër automobilistike në aksin e kryqëzimit Cerme-Rrogozhine mbi lumin Shkumbin paraqet probleme konstruktive në themelet e saj, të cilat janë ekspozuar si rezultat i gërryerjeve për shkak të ngushtimit të shtratit të lumit.
Si rezultat i këtyre problemeve ARRSH vendosi që ura do të mbyllet përkohësisht deri në marrjen e masave për rehabilitimin e themeleve, me qëllim parandalimin e situatave që mund të krijohen nga lëvizshmëria në këtë aks.
ARRSH njofton të gjithë qytetarët që është miratuar plani i lëvizjes së mjeteve në rrugë alternative. ARRSH në bashkëpunim me drejtorinë e hekurudhës do hartojnë projektin për ndërhyrjen në themelet e urës si dhe zgjerimin e shtratit duke pastruar mbetjet e ngurta urbane të hedhura ndër vite”, njofton ARRSH.
