Një tjetër dosje me përgjime, përveç asaj që njihet me numrin 339, pritet të zbardhet nga prokuroria.
Kjo është paralajmëruar nga kreu demokrat, Lulzim Basha, gjatë një komunikimi me mediat. Dosja në fjalë mban nr 184 dhe I përket qarkut të Dibrës. Me shumë mundësi ajo është e ngjashme me dosjen 339 ku nga dokumentet e zbardhur ka dalë në dritë përfshirja e kryebashkiakut Vangjush Dako me pjesëtarë të një grupi criminal, ku diskutohet mbi blerjen e votave në Durrës.
Prej kohësh është folur për një dosje përgjimesh në qarkun e Dibrës mbi të njëjtin fenomen, blerjen e votave, dhe mbi politikanët që janë përgjuar.
“Edi Rama! Dosja 339 është makthi yt! Ti e di fare mirë se përtej minutave që janë botuar nga Zëri i Amerikës dhe nga BIRN-i, çfarë përmban ajo dosje.
Uroj ta dish se çfarë përmban dhe Dosja 184! Të dyja këto dosje do të zbardhen!
Drejtësisë do t’i zgjidhen duart! Të gjithë politikanët e përfshirë me kokat e krimit të organizuar do të shkojnë para drejtësisë dhe shqiptarët do të kenë zgjedhje të lira dhe të ndershme’, tha kreu i opozitës Lulzim Basha.
