Interi ka arkivuar një humbje të dhimbshme ndaj Kaljarit, ku tashmë e sheh veten edhe poshtë kuqezinjve të Milanit në renditje. Në shtëpinë zikaltër pritet të jetë një javë e rëndësishme për sa i përket çështjes Ikardi.
Cikli i terapisë ka përfunduar për ish-kapitenin e Interit dhe ditën e mërkurë sulmuesi do të jetë përballë Spaletit dhe doktor Volpit, ky i fundit është marrë me gjendjen e argjentinasit këto kohë. Sipas asaj që raporton “Gazzeta dello Sport” gjithçka varet shumë nga dëshira e Ikardit, nëse ai është gati të rifillojë me grupin, atëherë do të thirret në skuadër që për ndeshjen me Eintraktin e Frakfurtit në Europa Ligë.
Mesa duket Interi do të bëjë hapin e parë për të zhbllokuar situatën dhe Ikardit i ngelet në dorë të vendosë nëse do të kthehet në grup apo do të vazhdojë me këtë strategji. Në sfond qëndron edhe situata e ripërtëritjes së kontratës. Inter po mendon të bëjë një ofertë zyrtare për rinovimin e tij me 7 milionë euro në sezon, plus bonuse. Topi në fushën e Ikardit.
