Nga Boldnews.al
Në Shkurt të vitit 2018, Komisioni i Vetingut ndërpreu procedurën e verifikimit për anëtarin e Gjykatës Kushtetuese, Besnik Imeraj, për shkak se ai dha dorëheqjen para se të dilte në seancë dëgjimore.
Gjithësesi, institucionet ndihmëse të Komisionit të Pavarur të Kualifikimit kishin arritur të dorëzonin raportet e tyre për subjektin Imeraj.
“Boldnews.al” ka siguruar raportin sekret të Drejtorisë së Sigurimit të Informacionit të Klasifikuar (DSIK), e cila ka marrë në shqyrtim dhe ka dhënë vlerësimin e saj për faktin që gjyqtarit Imeraj i ishte revokuar viza amerikane
DSIK, në raportin e datës 07.11.2017, ka konstatuar “papërshtatshmërinë” e subjekti Besnik Imeraj, ndër të tjera, për faktin se atij i është hequr viza amerikane.
Në dokumentin që publikohet ekskluzivisht, DSIK shkruan: “Shoqërimi i aplikantit për vizë të SHBA shoqërohet me verifikim të besueshëm dhe profesional të aplikantit. Marrja e vizës së SHBA-së kuptohet si standart për pastërtinë e figurës, ku aplikanti i nënshtrohet një procedure të imtësishme dhe të besueshme vetingu. Ndërkohë që refuzimi/revokimi i vizës mund të bëhet për disa arsye, sjellim në vëmendje se Ambasada e SHBA ka deklaruar se do të përdorë të gjitha mjetet ligjore që ka në dispozicion për refuzimin/revokimin e vizave të gjyqtarëve dhe prokurorëve të korruptuar”.
Besnik Imeraj ishte pjesë e një liste gjyqtarësh e prokurorësh, të cilëve ambasada amerikane u revokoi vizën në bllok, në Janar 2017.
Në atë kohë, ky veprim drastik i Ambasadës së drejtuar nga Donald Lu, u konsiderua si një “masë” ndaj gjyqtarëve e prokurorëve, të cilët kishin mendime alternative për projektin e Reformës në Drejtësi.
Ambasada Amerikane, në një njoftim publik të asaj kohe, deklaroi se: “… e ka ndërmarrë këtë veprim përpara procesit të pritshëm të vetingut, i cili do të vlerësojë lidhjet e zyrtarëve të caktuar me korrupsionin…”.
Kjo masë e Ambasadës shkaktoi reagime të fuqishme brenda komunitetit të juristëve, por edhe të disa politikanëve të lartë. Ilir Meta, në atë kohë Kryetar i Parlamentit, deklaroi në një intervistë televizive se “… ka vetëm një Vetting dhe atë e bëjnë institucionet shqiptare dhe asnjë ambasadë e huaj, përfshi edhe atë të SHBA…”.
Por, përtej kësaj fraze të Metës, i cili sot është Presidenti i Republikës, DSIK duket se e ka vlerësuar seriozisht faktin e revokimit të vizës për gjyqtarët e prokurorët nga ambasada e SHBA.
Për Drejtorinë e Sigurimit të Informacionit të Klasifikuar, ky fakt, pra revokimi i vizës, është i mjaftueshëm që zyrtarët e sistemit të drejtësisë të konsiderohen “të papërshtatshëm” për të vijuar detyrën.
