Nga Klodian Tomorri
Ministrja e Shëndetësisë komunikoi sot për qytetarët vendimin e qeverisë për indeksimin e çmimit të barnave, duke reflektuar në çmimet e reja rënien e euros. Sipas ministres, përmes këtij vendimit, qeveria i ka kursyer xhepave të qytetarëve dhe arkës publike 7.5 milionë euro.
Në fakt, ajo që ka ndodhur është e kundërta. Për shkak të shkeljes së ligjit nga Ministria e Shëndetësisë, qytetarëve u është futur dora në xhep dhe u janë marrë para pa të drejtë.
Indeksimi i ilaçeve është një detyrim ligjor i sanksionuar në ligjin “Për Barnat dhe Shërbimin Farmaceutik”. Ky ligj ja ngarkon Komisionit të Çmimit të Barnave detyrimin që cdo vit, të bëjë indeksimin e çmimit të ilaceve. Modalitetet se si Komisioni e bën këtë indeksim, janë të përcaktuara në vendimin nr 645 të Këshillit Ministrave i vitit 2014.
Në nenin 17, VKM thotë shprehimisht; në datë 31 dhjetor të çdo viti Komisioni i Çmimit të Barnave është i detyruar që përmes Drejtorisë Farmaceutike, të shpallë çmimet e reja zyrtare të barnave, të cilat hyjnë automatikisht në fuqi. Pra në 31 dhjetor të çdo viti.
Ky është një proçes i kontrolluar tërësisht nga Ministria e Shëndetësisë, në të gjitha hallkat e tij. Pyetja që shtrohet është, pse nuk u shpallën çmimet e reja në datën 31 dhjetor siç e kërkon ligji, por 2 muaj më vonë. Përgjigja qëndron te numrat.
Buxheti i shtetit jep reth 110 milionë euro në vit për rimbursimin e ilaçeve. Zhvlerësimi i euros me 7 për qind ndaj lekut krahasuar me vjet duhet t’i kishte kursyer buxhetit 7.5 milionë euro për këtë vit për rimbursimin e ilaçeve, mesatarisht 625 mijë euro në muaj.
Por çmimet në janar nuk u indeksuan, as në shkurt. Për këto dy muaj ato u rimbursuan me çmimet e vitit të kaluar, kur euro ishte 135 lekë. Si pasojë e mosindeksimit të detyrueshëm ligjor, për këto dy muaj buxhetit të shtetit ju grabitën 1.2 milionë euro, para të cilat i kanë marrë pa të drejtë dhe në mënyre abuzive mafia e ilaçeve. Këtë ka bërë Ministria e Shëndetësisë.
“Transparenca, llogaridhënia dhe siguria e qytetarëve janë parimet bazë të punës tonë,” tha Ministrja e Shëndetësisë.
Pikërisht zonja ministre, në emër të transparencës; kush i mori ato 1.2 milionë euro? Pse “harroi” Ministria e Shëndetësisë t’i ulte çmimet e ilaçeve në datën 1 Janar?
