Deputetët e Parlamentit Europian që ishin në Tiranë në kuadër të një vizite, që përkon me krizën politike në vend, duket se kanë entuziasmuar Taulant Ballën me deklaratat e tyre.
Europarlamentarët kërkuan nga opozita të ndërpresë bojkotin dhe i kërkuan kandidatëve për deputet në listat e partive opozitare që të marrin mandatet e mbetura, duke plotësuar vakancën.
Në fakt deklaratat shabllone të ndërkombëtarëve nuk janë të panjohura në mjedisin politik shqiptar dhe hera herës shfrytëzohen nga qeveritë që kanë qenë në kohë të ndryshme. E njëjta gjë ka ndodhur kur PS ishte në opozitë dhe PD në pushtet.
Tashmë ka ardhur koha që të entuziasmuar të ndjehen socialistët e Edi Ramës.
“Parlamenti Europian përkrah fuqimisht hapjen e bisedimeve të anëtarësimit në BE me Shqipërinë dhe Maqedoninë e Veriut në qershor 2019. Mirënjohës ndaj mesazheve inkurajuese #TunneKelam @CDPreda @knufleckenstein @JFLopezAguilar @BasBelderMEP @ilhankyuchyuk @MeszericsT”,shkruan Balla, në një postim në rrjet.
Duke u ndalur tek kriza politike, numri 2 i PS-së thotë se PE i dha një mesazh të qartë opozitës kur i kërkoi të braktisë, atë që e quan kurs të rrezikshëm politik duke iu kthyer jetës institucionale.
“Partia Socialiste mirëpriti përfshirjen e kolegëve tanë të Parlamentit Europian që i kërkuan opozitës të braktisë kursin e saj të rrezikshëm politik, ndalimin e dhunës dhe kthimin në jetën institucionale dhe përfshirjen e tyre në listën e deputetëve për të nderuar mandatin që elektorati u dha atyre”,- shton Balla.
