Opozita do të ishte e gatshme që të pranonte një tryezë politike të thirrur nga Presidenti i Republikës për të zgjidhur konfliktin politik pas dorëheqjes nga opozita dhe protestave.
Kështu u shpreh ish-deputeti i LSI-së, Edmond Panariti, i ftuar në emisionin “45 Minuta” në Report Tv.
Por a do të pranonte opozita në tryezën e dialogut Edi Ramën? “Rama është kryetar i PS, në kostumin e kryeministrit nuk e pranojmë, por nëse PS e zgjedh për t’u ulur në dialog, atëherë është punë e tyre.. Me një qeverie kalimtare, teknike ne shkojmë qetësisht drejt sfidës së hapjes së negociatave” tha Panariti.
Sipas tij, Presidenti Meta është mbi palët dhe mund të marrë rolin një iniciativë të tillë në momente krizash.
“Marrëveshja e çadrës ishte kundër produktive. Basha dhe LSI janë të qartë në objektivat që kanë.
Po vijuam kështu do të shkojmë drejt një përplasjeje, pasi kështu do të shkojë ajo punë. Ne nuk shohim ndonjë arsye për shtyrjen e mëtejshme të vendimit, pasi kushtet e vëna janë përmbushur.
Presidenti në momentet e krizave mund të marrë përsipër një inciativë për të ulur palët për të gjetur një zgjidhje.
Do të jetë e mirëpritur nëse merr një inciativë për një tryezë. Por tani kemi shkuar shumë larg.
Po shikoj tendenca për të mbushur atë parlament, do të ishte një diskreditim, do të ishte një njollë turpi”, tha Panariti.
