Policia e Tiranës ka identifikuar dhe proceduar penalisht 4 persona, të cilët më datë 23 shkurt 2019, gjatë zhvillimit të ndeshjes “Partizani-Flamurtari”, ushtruan dhunë fizike ndaj fotografit të ekipit të “Flamurtari-t”.
Shërbimet e Komisariatit të Policisë Nr.2, identifikuan dhe proceduan penalisht në gjëndje të lirë, shtetasit:
- Xh., 31 vjeç, banues në Tiranë
- Ll., 31 vjeç, banues në Tiranë
- B., 19 vjeç, banues në Tiranë
- H., 28 vjeç, banues në Tiranë
Këta shtetas më datë 23 shkurt 2019, rreth orës 17:40, tek stadiumi “Selaman Stërmasi”, gjatë zhvillimit të ndeshjes “Partizani-Flamurtari”, kanë hyrë në fushë dhe kanë goditur shtetasin Sh. R., 32 vjeç (fotograf i ekipit “Flamurtari”).
Materialet iu referuan Prokurorisë së Rrethit Gjyqësor Tiranë në ngarkim të shtetasve të lartpërmendur për veprat penale “Prishje e rendit dhe qetësisë publike”, “Mosbindje e urdhërit të punonjësit të rendit publik”, “Dëmtime të tjera me dashje e kryer në bashkëpunim”, parashikuar nga nenet 274, 242 dhe 90/25 të Kodit Penal.
Lidhur me incidentin ka reaguar edhe Federata Shqiptare e Futbollit, e cila dënoi me ashpërsi dhunën e ushtruar ndaj fotografit të klubit dhe lojtarëve të Flamurtarit në stadiumin “Selman Stërmasi”.
FSHF thotë se ngjarje e tillë nuk ka aspak lidhje me lojën e futbollit dhe frymën “Fair Play” që duhet të përcjellin të gjithë. Federata ka edhe një mesazh për klubet që të punojnë sa më shumë me tifozeritë dhe stafet e tyre që ngjarje të tilla të mos përsëriten më.
Në të njëjtën kohë FSHF kërkon nga organet ligjzbatuese, Policia e Shtetit dhe Prokuroria që të vendosin përpara ligjit agresorët të cilët janë evidentuar nga pamjet filmike. FSHF dhe zyrtari i Klubit Flamurtari kanë dorëzuar kallëzimin penal dhe kërkojnë nga Policia veprim. “FSHF do të qëndrojë në kontakte të vazhdueshme me autoritetet përkatëse të rendit dhe me klubet për ti dhënë një zgjidhje përfundimtare këtij problemi, që dëmton dhe cënon imazhin e futbollit shqiptar. Situata dhe ngjarje të tilla nuk duhet të përsëriten më në stadiumet shqiptare.”- shkruhet në njoftimin e shpërndarë nga Federata.
