Protesta e opozitës para Kuvendit zgjati rreth 3 orë, ndërsa policia hodhi gaz lotsjellës ndaj protestuesve, duke lënë të dëmtuar me dhjetra qytetarë, mes të cilëve edhe fëmijë.
Protesta shënoi disa incidente të vogla, ndërsa disa qindra forca policore kishin rrethuar Parlamentin, që u thirr në seancë plenare jashtë rradhe, ndoshta për të shmangur protestën e paralajmëruar nga opozita për të enjten.
Por duket se gazi lotsjellës që u përdor edhe në këtë protestë pa kursim nga policia nuk i ka mjaftuar ligjvënësve socialistë, që morën pjesë në seancë.
Deputeti Paulin Sterkaj ka bërë thirrje që policia të pajiset me të gjitha pajisjet e duhura për të përballuar turmat.
“Policët të jenë të veshur me të gjithë pajisjet e sulmit të turmave që thyejnë ligjin dhe destabilizojnë vendin”, tha Sterkaj.
Deputeti socialist i qarkut të Shkodrës pati disa probleme gjatë hyrjes në Kuvend, pasi protestuesit tentuan të pengojnë atë të kalonte gardhin, që këtë herë nuk ishte tel me gjemba, por me policë.
