Në Gjykatën e Krimeve të Rënda ka nisur gjykimi ndaj Klement Balilit. Mbi Balilin rëndon akuza e trafikut ndërkombëtar të drogës, pastrimit të parave dhe mosdeklarim pasurie, dhe pjesëmarrje në grupin e strukturuar kriminal.
Në mesin e muajit janar 2019, pas më shumë se dy vjet arratie, Balili u vetëdorëzua në Policinë e Shtetit, ndërsa ai u transportua drejt Tiranës me automjetin e Drejtorit të Përgjithshëm, Ard Veliu.
Në vitin 2014 Klement Balili u emërua nga LSI Drejtor i Drejtorisë së Transporteve në qytetin e Sarandës.
Një nga nipat e tij u zgjodh në atë kohë kryetar i Bashkisë së Delvinës, nën siglën e LSI-së, ndërsa një vëlla i tij ka qenë gjithashtu koordinar i LSI-së po në Jug të vendit.
Në vitin 2016 në Greqi dolën disa përgjime të telefonatave të tij dhe u raportua se një biznesmen nga Saranda ishte kryetari i një organizate kriminale të trafikut ndërkombëtar të drogës, por se kishte mbështëtje të fuqishme politike në vendin e tij.
Media zbardhi biseda të Klementit bërë me bashkëpunëtorët e tij në Greqi, për organizimin dhe nisjen e skafit të mbushur me rreth 680 kg hashash drejt Greqisë mesnatën e 6 Majit 2016. Një numër i madh anëtarësh të organizatës u arrestuan në Greqi dhe në disa vende europiane, ndërsa Balili vetë mundi të shpëtojë.
CNN grek në atë kohë hyri në polemika me ambasadën shqiptare në Athinë pasi botoi një shkrim në të cilin duke iu referuar burimeve të autoriteteve greke, theksonte se oficerë të policisë shqiptare kishin deklaruar se “baronin shqiptar” nuk mund ta arrestonin për shkak se ai kishte mbrojtje politike ne Tiranë.
Në seancën gjyqësore të 25 janarit ku u njoh me masën e sigurisë, avokati i Balilit kërkoi gjykim të shkurtuar.
Prokuroria në akuzat e ngritura ndaj Balilit iu referohet hetimeve greke që e ekspozojnë Klement Balilin si njeriun që trafikoi 678 kilogramë kanabis, një ngarkesë që u kalua nga brigjet e Sarandës më 5 maj të vitit 2016.
Emri i Klement Balilit është përmendur disa herë nga ish-ambasadori amerikan në Tiranë, Donald Lu, që e përfshiu atë te peshqit e mëdhenj që duhej arrestuar.
