Pas dorëzimit që Kuvendi i bëri në Komisionin Qendror të Zgjedhjeve dokumentacionit të dorëheqjeve të deputetëve të opozitës parlamentare, KQZ ka hedhur hapin e radhës.
Burime bëjnë me dije për ABC Neës se Komisioni Qendror i Zgjedhjeve ka marrë në administrim dokumentat e nisura nga Kuvendi i Shqipërisë, dhe ka bërë verifikim teknik të tij.
Por në njoftimin që Kryesia e Kuvendit i ka dërguar KQZ-së, burimet konfirmojnë se nuk janë konstatuar vakancat e krijuara nga heqja dorë e deputetëve të opozitës.
Për këtë arsye, Komisioni Qendror i Zgjedhjeve i ka dërguar Kuvendit një kërkesë për sqarim. Bazuar në legjislacionin shqiptar, është Kuvendi, ai i cili ka tagrin për të administruar dorëheqjet e deputeteve, përmes Këshillit të Rregullores, Mandateve dhe Imunitetit.
Më pas Këshilli përpilon një raport, i cili votohet në seancë plenare për të zyrtarizuar vakancat në Parlament, të cilat më pas i njoftohen Komisionit Qendror të Zgjedhjeve.
Vetëm atëherë ky i fundit, duke u bazuar në listën shumë-emërore të subjekteve politike zgjedhore, me vendim i kalon mandatin kandidatit të radhës. /abcnews.al/
