Nga Erl Kodra
Në fillim rrotulloje çelsin në bravën ku ke mbyllur fjalën. Pastaj kujdesu që zëri i mekur që depërton përtej betonit të trashë dhe budalla, të jetë i dobët. Nëse zëri i dobët, por me timbër të thellë të shqetëson, injoroje dhe mbyte me zhurma triumfuese. Kalëroji banalisht dhe brutalisht të gjitha ato pika lidhëse që mbajnë në këmbë sistemin. Kujdesu që “rrugët e reja” të jenë të vjetra, duke i përshtatur sipas interesit tënd. Bliji me çdo çmim të gjitha pikat kyçe të komunikimit publik. Kujdesu që mediat e vendit të japin vetëm emisione për njerëz të lumtur, të bukur dhe me suksese spektakolare. Ndërto fasada ndriçuese që të trullosin nga shkëlqimi. Popullit jepu nga njëqind kile hashash dhe mbylli sytë, edhe kur bari magjik të pushtojë vendin. Lidhu me meshkujt alpha që kontrollojnë territorin, bashkëpuno, q**u para dhe mbrapa, bëji partner të punëve publike. Mashtro, mashtro, mashtro.
Suksesi është i garantuar.
Asnjëherë mos harro që pikave kyçe të komunikimit t’u afrohet armiku. Armiku do ndjehet i demonizuar, i dekurajuar, i çoroditur, i mutafepsur, i zhgënjyer, i zhyer dhe inferior para madhështisë së Muç Nanos, Lorenc Vangjelit, Sokol Ballës, Eni Vasilit, Vasjarit, Minxhozit, Luarasit, Mero Bazes, Gazetës Tema, Gazetës Dita, Sot, Shqiptarja, Top Channel, Klan Tv, Vizion Plus dhe TopKlanPlusERTV. Kjo është formula, forma, rruga, e vërteta dhe jeta.
Bli çka të del përpara dhe është në shitje. Mos harro se gjithçka shitet, edhe ajo që në pamje të parë nuk shitet. Bli parime fallco të veshura me kostume ambasadorësh që presupozohet të jenë të pa anshëm, investo pa kursim që infrastruktura jote të funksionojë nën dhe, me hafije të blera që kanë dhënë prova me shërbime të pamoralshme. Shfaqi ata në pikat kyçe ndërsa bëjnë deklarata të turpshme kundër popullit armik.
Popullit armik do t’i hyjë frikë në palcë. Do të tmerrohet nga fuqia juaj triumfaliste dhe të ulë qafën më poshtë, tek këmbët tuaja. Mos ndalo që përditë ta shfaqësh fuqinë tëndë, ndërsa shk*rrdhen popullin armik si një bishë seksi. Për këtë kujdesu të vishesh ndryshe, me çitjane Channel, atlete Adidas, syze k*rvash, mjekër të kuruar cjapi, kollaro të shtrenjta me bisht kunadheje, jelekë dhe papiona me flutura, dhe kostume 20 mijëshe. Do të të adhurojnë si Skënderbeun.
Kryesorja; promovo në detyrat më të larta njerëzit pa eshtra, pa palcë kurrizore, bosh dhe anonim. Mbaj Gramoz Ruçin nga Garda e Vjetër e Partisë në Krye të Grigjës tënde. Ngrije Ulsiun, Sadriun, Taulantin, Elisën, Frrokun, Rexhepin, Roshin, Ndreun, Ndokën, Xhelilin; sepse janë kafshë besnike, që kafshojnë fort, bërtasin fort, gënjejnë shumë, lajnë, lyejn, vrasin, presin, vjedhin, shk*rdhejnë pa hesap, për hesapet e tua sigurisht.
Shkurt, populli armik do të tmerrohet nga neveria, prandaj do të nënshtrohet, dorëzohet, sëmuret, arratiset nga vendi.
Pastaj Mbreti do të jeni Ju, Madhëria Juaj Madhështore.
***
Në fund, në ditën tënde më të zezë, thërrit nën armë Armën e Sigurimit të Shtetit. Vendose atë në pikat kyçe prej ku gjithçka manipulohet. Manopulo pa mëshirë, shaj dhe fyej, shpif dhe deformo, zhurmo dhe delegjitimo, akuzo dhe mos prano, përdor dhe shantazho, bli nga kampi i armikut dhe merr peng mëkatarët. Kërcëno me jetë familjet e atyre që dijnë shumë për krimet që ti ke bërë. Edhe nëse janë larg, gjeji ku të jenë; dërgoju mesazhe që ndajnë jetën me vdekjen. Kujdesu që mesazhi të jetë sa më i neveritshëm, pervers, përçudnues, poshtërues, brutal, i ndyrë.
Do shikosh se si do të thyhet edhe më konseguenti.
