Këngëtari R Kelly është ngarkuar me 10 akuza penale për abuzime të rënda seksuale, nëntë prej të cilave përfshijnë vajza të mitur.
“Ylli i R & B, emri i të cilit është Robert Sylvester Kelly, rrezikon të dënohet me një maksimum prej shtatë vjetësh burg për secilën prej akuzave”, raporton BBC.
Një urdhër arresti është lëshuar për 52-vjeçarin. Avokati i tij thotë se ai është “i tronditur nga skandali” dhe do të kthehet në të premten për t’u përballur me akuzat.
Për këngëtarin e famshëm ka patur prej dekadash pretendime për abuzim seksual ndaj grave dhe të miturave, por kurrë nuk është dënuar, ndërsa ka deklaruar gjithmonë se është i pafajshëm.
Aktakuza është zyrtarizuar vetëm disa javë pasi u transmetua një seri dokumentare e quajtur “Surviving R Kelly”.
Ai përmbante denoncime nga shumë gra gjatë shumë viteve për abuzim nga R Kelly, duke përfshirë ish-gruan e këngëtarit.
Sipas prokurorëve, akuzat penale iu referohen fakteve të ndodhura në vitet 1998- 2010.
Dokumentet thonë se të paktën tre nga viktimat ishin të moshës midis 13 dhe 16 vjeç në kohën e abuzimeve të raportuara. Kelly u lirua më parë nga akuza për “akte të turpshme” me fëmijë në vitin 2008.
Avokati Michael Avenatti që përfaqëson gjashtë nga viktimat, tha se ka pamje filmike që tregojnë raportet seksuale, ndër të cilat një marrëdhënie me një vajzë të mitur. Ai ka shtuar se Kelly dhe vajza “në mënyrë të përsëritur” e referojnë moshën e saj si 14 vjeç në video.
Njerëzit kanë bërë thirrje për bojkotim të muzikës së Kelly me hashtagun #MuteRKelly.
