Skënderbeu prej pasdites së djeshme është “ngujuar”. Ekipi është grumbulluar i gjithi në rezidencën e zakonshme dhe ashtu si çdo herë, nuk ka munguar as vizita e presidentit së bashku me drejtuesit e tjerë të klubit. Ardjan Takaj ka mbajtur një fjalim motivues para futbollistëve.
Ai u ka dhënë besim të plotë, por nga ana tjetër nuk ka ngurruar që të kërkojë edhe reagimin kundër Tiranës. Më pas “stafeta” ka kaluar tek Orges Shehi, i cili ka zhvilluar video-analizë. Korçarët kanë parë fragmente të fitores së fundit të bardhebluve në transfertë, atë kundër Kukësit. Por, jashtë vëmendjes nuk lanë as veten, pasi ndoqën edhe takimet që kanë zhvilluar dhe humbur rishtas përballë Flamurtarit dhe Partizanit në kampionat. Një gjë e tillë është e zakonshme për korçarët, ku nxjerrin në pah gabimet e bëra në javët e fundit dhe pikat e dobëta dhe të forta të kundërshtarit që do të kenë përballë.
