Ervin Salianji, deputet i PD-së, e cilësoi si një akt sakrifice të opozitës, dorëzimin e mandateve të deputetëve, për të rikthyer demokracinë në vend.
Salianji tha se në fund do të jenë qytetarët ato që do të fitojnë përballë Edi Ramës.
“Rama do të humbasë përballë popullit. Një sistem i keq duhet shembur, ashtu sikundër ndodhi në 1990, siç tentohet të ndodhë në Rusi, apo siç ka ndodhur në vende të tjera”, tha Salianji në “Zonë e Lirë”.
Sipas deputetit të PD-së, Edi Rama po shkon drejt një sistemi monopartiak, ku çdo gjë do të kontrollohet nga Kryeministri.
“Sot krizën e ka Rama, ai qeveris dhe ka përgjegjësitë e tij. Nuk ka asnjë risk që opozita të rrudhet. Tashmë Rama ka përballë qytetarët”, tha Salianji.
Deputeti i PD-së tha se Rama nuk mund të mbyllë mandatin e plotë si kryeministër pasi ka një mandate të vjedhur, ekonomia është e dobët dhe të gjithë njerëzit e tij politikë, janë të kapur në përgjime apo afera korruptive.
