Lëmshi i “Reformës” / Nuk ekziston institucioni që shkarkon Prokurorin e Përgjithshëm

Nga Boldnews.al

Një kërkesë e grupeve parlamentare PD-LSI, drejtuar Këshillit të Lartë të Prokurorisë (KLP) për shkarkimin e Kryeprokurores Arta Marku, sjell në vëmendje një tjetër ngërç të rëndë kushtetues, si pasojë e Reformës në Drejtësi, e cila rezulton e pamenduar aspak mirë.

Pak javë më parë, krerët e grupeve parlamentare opozitare i kërkuan zyrtarisht KLP nisjen e procedurave për shkarkimin e Arta Markut. Sipas opozitës, Kryeprokurorja e Përkohshme ka dështuar në verifikimin e figurës së kandidatit dhe sot anëtarit të KLP, Bujar Sheshi, i cili rezulton si ish-bashkëpunëtor i Sigurimit të Shtetit në bazë të një vendimi të Autoritetit të Dosjeve.

Këshilli i Lartë i Prokurorisë e shqyrtoi këtë kërkesë paraditen e së Premtes dhe arriti në konkluzionin se “nuk është kompetent për shqyrtimin e kësaj kërkese”.

Në fakt, Kushtetuta, në nenin 149/c, pika 2 parashikon se, për shkelje të ligjit, “Prokurori i Përgjithshëm shkarkohet nga Gjykata Kushtetuese…”.

Bazuar në përcaktimin kushtetues, Këshilli i Lartë i Prokurorisë, me të drejtë, vendosi të mos marrë në shqyrtim kërkesën e PD-LSI për shkarkimin e Arta Markut.

Por, ky diskutim risjell në vëmendje problematikat e theksuara të Reformës në Drejtësi. Gjykata Kushtetuese, institucioni që ndër të tjera ka kompetencë për shkarkimin e Prokurorit të Përgjithshëm dhe anëtarit të Këshillit të Lartë të Prokurorisë, nuk është funksional prej shumë muajsh.

Aktualisht, Gjykata Kushtetuese, nga 9 anëtarë, ka vetëm një, Vitore Tushën, edhe kjo me mandat të përfunduar. Gjashtë gjyqtarë kushtetues u shkarkuan gjatë procesit të Vetingut, ndërsa dy të tjerë dhanë dorëheqjen para se të niste procesi i rivlerësimit.

LEXO EDHE  ‘Burg, burg, burg...’/ Ish-ministri i Ramës apel qyfterëve: Të ndalim epshin e sundimtarit që po ...

Në këto kushte, nuk ekziston asnjë institucion që të shqyrtojë shkeljet e mundshme të Prokurorit të Përgjithshëm dhe anëtarit të Këshillit të Lartë të Prokurorisë.

Në këtë moment, janë të paktën dy raste, të cilat, teorikisht, Gjykata Kushtetuese mund të vendoste shkarkimin e zyrtarëve të lartë, nëse do të konstatoheshin shkelje.

Së pari, Kryeprokurorja Arta dyshohet se ka shpërdoruar detyrën, pasi konstatoi plotësimin e kritereve ligjore për Bujar Sheshin, në kohën kur ky i fundit aplikoi për anëtar të Këshillit të Lartë të Prokurorisë.

Siç rezultoi më vonë, Bujar Sheshi nuk duhet të zgjidhej në atë funksion, për faktin se Autoriteti i Dosjeve konstatoi se ai ka qenë ish-bashkëpunëtor të Sigurimit të Shtetit.

Së dyti, Gjykata Kushtetuese mund të merrte në shqyrtim shkarkimin e anëtarit të Këshillit të Lartë të Prokurorisë, Bujar Sheshi, pasi, siç rezulton nga vendimi i Autoritetit të Dosjeve, ka qenë bashkëpunëtor i ish-Sigurimit të Shtetit, situatë e cila ndalon zgjedhjen në institucione të larta të sistemit të drejtësisë.

Por, në mungesë të Gjykatës Kushtetuese, sot nuk ka asnjë institucion që të shqyrtojë shkeljet e Prokurorit të Përgjithshëm (të përkohshëm) dhe anëtarit të Këshillit të Lartë të Prokurorisë.

Ata mund të pezullohen nga detyra vetëm me vendim gjykate, në rast arrestimi ose marrje si të pandehur. Në rastet e tjera, këta zyrtarë vijojnë të qetë detyrën e tyre, përsa kohë Shqipëria nuk ka Gjykatë Kushtetuese.