Lulzim Basha, kryetar i PD-së, ka mbledhur kryesinë e kësaj partie, një ditë pasi deputetët e opozitës zyrtarizuan dorëzimin e mandateve.
Mbledhja e Kryesisë pritet të përcaktojë strategjinë që do të ndjekë partia më e madhe e opozitës, që do të jetë një gërshetim mes protestave në qytetet dhe bashkitë kryesore të vendit, dhe takimeve me faktorin ndërkombëtar.
Pritet që mbledhja e Kryesisë të përcaktojë grupet e punës sipas qarqeve, ku do të shpërndahen anëtarë të forumeve drejtuese dhe deputetët, që do të punojnë bashkarisht me strukturat e degëve dhe ato të partive aleate për organizimin e protestave, por edhe të takimeve me qytetarët.
Basha mblodhi kryesinë vetëm pak orë pas përfundimit të një vizite në Vjenë, ndërsa javën e ardhshme pritet të udhëtojë drejt Berlinit ku do të takohet me deputetë të Bundestagut dhe drejtues të grupimit CDU/CSU.
Pak përpara mbledhjes së Kryesisë, Fatbardh Kadilli, deklaroi se nuk do të ketë kthim mbrapa deri në plotësimin e të drejtave themelore të shqiptarëve, garantimin e një proçesi të lirë dhe të ndershëm zgjedhor.
Kadilli ka ripërsëritur kërkesën për largimin e Edi Ramës dhe krijimin e një qeverie tranzitore.
