Nga Boldnews.al
Në 2-3 vitet e fundit, Ambasada Amerikane në Tiranë është munduar të ruajë pushtetin e Edi Ramës, me qëllim ruajtjen e të ashtuquajturës “Stabilokraci” në Shqipëri.
Mekanizmi i zgjedhur ka qenë kërcënimi me refuzimin apo heqjen e vizës së udhëtimit në SHBA për zyrtarë politikë dhe të sistemit të drejtësisë.
Gjatë mandatit të ambasadorit Donald Lu, ky mjet presioni pati efekt. Opozita u detyrua që të votojë Reformën skandaloze në Drejtësi, vetëm që të mos gjendej para bllokimit të hyrjes në SHBA.
Ky bllokim do të përkthehej në opinionin publik shqiptar si një refuzim i opozitarëve nga partneri më i madh ndërkombëtar, Shtetet e Bashkuara të Amerikës.
Por, ky mjet presioni, i përdorur rëndom nga “Rruga e Elbasanit” në Tiranë, e humbi shumë shpejt efektin. Refuzimi apo bllokimi i vizave amerikane u shfrytëzua nga disa zyrtarucë të ambasadës Amerikane në Tiranë, përfshirë Donald Lu. Ai e përdori këtë mjet shantazhi për këdo që nuk i bindjej vullnetit të tij apo që kundërshtonte Edi Ramën.
Në ditët e fundit, Ambasada Amerikane në Tiranë ka bërë thirrje të forta kundër protestave të dhunshme në Tiranë dhe kundër dorëzimit të mandateve. Por opozita, e cila është distancuar nga dhuna, nuk ka hequr dorë nga “djegia” e mandateve parlamentare.
Hapi i radhës nga Ambasada Amerikane pritej të ishte heqja e vizave për opozitarët, në tentativën e fundit për të ruajtur “Stabilokracinë”. Të paktën kështu ka shpresuar Edi Rama dhe Rilindja e tij.
Por, a do të munden diplomatët amerikanë në Tiranë të bindin shefat e tyre në Uashington që të vendosin heqjen e vizës “në bllok” për deputetët opozitarë?
Ky skenar duket i pamundur. Jo vetëm për shkak të masivitetit, por sidomos për shkak se efekti i kësaj mase nuk do të ndikojë aspak në vendimin e partive opozitare për ndërmarrjen e kësaj lëvizje “in extremis”.
Drejtuesit e Partisë Demokratike dhe Lëvizjes Socialiste për Integrim e kanë të qartë që largimi formal nga Parlamenti nuk do të përkrahej nga Ambasada Amerikane, e cila synon ruajtjen e “status-quo-së” në Shqipëri dhe Ballkan.
Drejtuesi opozitarë e kishin të qartë se Ambasada Amerikane mund t’u refuzonte ose bllokonte vizat për të udhëtuar përtej oqeanit. E, megjithatë, ndërmorën lëvizjen e tyre të fortë, pasi kjo vlerësohet zgjidhja e vetme përballë pushtetit arrogant të Edi Ramës, të karakterizuar nga përfshirja në korrupsion dhe bashkëpunimi me krimin e organizuar.
Protestat e opozitës, shoqëruar me dorëzimin e mandateve parlamentare, janë konsideruar si përpjekje për të rikthyer parimet e demokracisë në Shqipëri. Ambasada Amerikane, deri më tani, është munduar të ruajë “Stabilokracinë”, me pasojë forcimin e pushtetit autokratik të Edi Ramës.
Tashmë që opozita shqiptare po ndërmerr hapa të fortë për demokracinë, a ka më vend për të mbrojtur “Stabilokracinë”? Zhvillimet duket se anojnë nga e drejta e opozitës, e mbështetur nga pjesë më e madhe e qytetarëve shqiptarë.
