Ambasadorja e Gjermanisë në Tiranë, Susanne Schütz, po zhvillon një takim me kreun demokrat Lulzim Basha.
Takimi vjen në vazhdën e përpjekjeve që kanë nisur diplomatët e akredituar në Tiranë për shmangien e një krize politike që mund të përfshijë vendin pas dorëzimit të mandateve nga deputetë të opozitës.
Mbrëmjen e së martës Basha priti në një takim Ambasadorin e Mbretërisë së Bashkuar në Shqipëri, Duncan Norman, ndërsa Kryeministri Rama dhe Kreu i Kuvendit, Gramoz Ruçi, takuan ambasadorët pak orë më pas.
Partia Demokratike dhe aleatët e saj, përfshi edhe LSI-në, kanë zyrtarizuar vendimin për djegien e mandateve të deputetëve, ndërsa të enjten para selisë së Parlamentit pritet të zhvillohet protesta e rradhës e opozitës.
Gjithashtu raportohet se të premten, kreu i PD-së, Lulzim Basha do të udhëtojë drejt Vjenës ku pritet të ketë takime me drejtues të OSBE-së dhe ambasadorë të rëndësishëm të akredituar pranë këtij Misioni.
