Nga Boldnews.al
Ministri i Brendshëm Sandër Lleshaj, në një reagim publik dy ditë pasi Gjykata e Apelit prishi vendimin me burgim të përjetshëm ndaj Dritan Dajtit dhe dënimin e tij me 25 vjet burgim, në “emocion” e sipër dekonspiroi operacionin që u zhvillua sot.
“Edhe pse nuk mund të jap detaje, deklaroj se Operacioni “Forca e Ligjit” është vënë në veprim të plotë për të adresuar me të gjithë forcën e së drejtës atentatin e qartë, brutal dhe skandaloz që i është bërë drejtësisë në vendin tonë, sakrificave të panumërta dhe gjakut të derdhur nga qindra punonjës të Policisë së Shtetit shqiptar përgjatë tri dekadave të fundit”.
Kjo ishte një pjesë e deklaratës së gjatë të ministrit Sandër Lleshaj, 48 orë pasi Gjykata e Apelit vendosi të rrëzojë dënimin me burgim të përjetshëm të Dritan Dajtit, duke i pranuar gjykimin e shkurtuar dhe dënimin e tij me 25 vjet burg. Por krahas qëndrimit, në dukje të fortë dhe me pasazhe reaguese të mbushura me “patetizëm politik”, pa dashje kreu i ministrisë së brendshme i dha një sinjal pesë gjyqtarëve të kësaj dosje se ishin nën survejim e po hetoheshin për këtë vendim të beftë.
Qoftë edhe kjo deklaratë u ka dhënë mundësi gjyqtarëve që të “tregohen të kujdeshëm” në komunikimet telefonike apo edhe fshehjen e ndonjë prove nëse ata ekzistonin. Hetimet proaktive, edhe me emrin e madh “Forca e Ligjit” më së pari kërkojnë fshehtësi të plotë dhe profesionalizëm. E para ra që në momentin kur në konferencën e shtypit ministri zbuloi se çështja ishte në zhvillim e sipër.
Sot në orët e para të mëngjesit, në të njëjtën kohë, forcat policore mësynë në banesat e tre prej gjyqtarëve të cilët vendosën me shumicë rrëzimin e vendimit me burg të përjetshëm. Ende nuk ka të dhëna mbi provat e siguruara, por e sigurtë është që gjyqtarët ishin në dijeni se ndaj tyre po kryhej një hetim.
