Partizani ka një transfertë mjaft delikate të dielën. Skuadra kryesuese do të udhëtojë drejt Laçit për të synuar fitoren në këtë fushë mjaft të vështirë. Vendasit do të jenë të motivuar, pasi kanë 5 ndeshje pa fitore. Marrëdhëniet mes dy klubeve janë të mira dhe korrekte, kjo shihet qartë dhe nga vendimi i fundit i klubit të Laçit.
Skuadra kurbinase i ka vendosur në dispozicion të gjithë tribunën pas porte tifozerisë së “demave”. Një vendim në dobi të atmosferës së ndeshjes, por dhe arkave të klubit nga ana e laçianëve, pavarësisht se kreyqytetasit do të kenë më shumë mbështetje nga tifozët.
Lajmin e ka publikuar tifo-grupi i Partizanit, “Ultras Guerrils”, përmes një postimi në faqen e tyre në “Facebook”. “Me kënaqësi ju njoftojmë se i gjithë sektori mbrapa porte është vënë ne dispozicion te tifozerisë sonë nga klubi i Laçit. Ndaj ka vend dhe bileta për të gjithë!”
Tifozët e Partizanit kanë punuar që në Laç të shkojnë me një numër të madh njerëzish. Transferta e këtij takimi do të jetë më e madhja që “Guerrilsat” kanë bërë në stadiumin e Laçit.
