Nga Boldnews.al
Efektivi i Forcave të Ndërhyrjes së Shpejtë, për “shpejtësi” kërkonte një banjo dhe u fut në Falultetin Juridik të Shkodrës. I rrethuar nga studentët që e panë me sytë e tyre arsyen e pranisë së tij në ambientet e fakultetit, u justifikua se ishte për “nevoja personale”…
Në fakt, më shumë se banjon kërkonte studente, apo edhe pedagoge të reja për seks. Trupmadhi, i veshur civil e me armë në brez, dyshohet se ngacmoi një studente, e më pas edhe profesoreshën, mjafton që të mos dilte bosh në gjuetinë e tij.
Pa asnjë teklif ruajti qetësinë kur kolegët e tij e sqaruan për këtë incident. Ende mbahet i lirë, në pritje të ndonjë mase disiplinore dhe i fokusuar në genjështrën e radhës që do lëshohet zyrtarisht nga strukturat më të larta policore.
Ndërsa në Malësi të Madhe u ndalua inspektori Behran Bajrakurti, pas publikimit të një video intime perverse që dyshohet se ia dërgoi një vajze të mitur 15-vjeçare, edhe djaloshi 26-vjeçar i FNSH-së ka ca hesape për të mbyllur. E keqja e tyre është se janë filmuar, ndryshe do kishin gjueti të mbarë… Të fundit të anatemuar janë këto dy policët e seksit, por ka edhe të tjerë, ata që janë dehur jo nga dashuria…
Sot, një tjetër e dhënë mbërriti nga Policia e Shtetit ku konfirmohet se gjatë vitit 2018, janë arrestuar apo proceduar penalisht për implikim në trafikun e drogës 21 efektivë policie. Një shifër e vogël krahasur me të dhënat e tmerrshme të drejtuesve të policisë që gjatë vitit 2016-2017 u kthyen ne “shefa të kanabisit” dhe u bënë njësh me krimin.
Përballë policëve të seksit e hashashit, ka shumë të tjerë që më parë se ta konsiderojnë veten të pushtetshëm nën uniformë, janë qytetarë të mirë. Polici i vërtetë është ai që rrezikon jetën në mbrojtje të çdo banori. Është ai qytetari i mirë që mbijeton me atë pagë të vogël.
Ai që në mos kredi ka një overdraft për të shlyer e sa përfundon njëri futet në borxh me tjetrin. Polici i mirë është ai i trysnuari nga shefat e sjellë nga pushteti. Polici i mirë është ai që anatemohet nga gjithë forcat politike, i dhunuar e fyer në krye të detyrës, sa herë tubohen e tërbohen militantët partiak.
Disa syresh, që nën uniformën e shtetit përlyhen në trafiqe apo perversitete, nuk mund ta njollosin shumicën, atë policin e mirë që preferon të bëjë autostop pë të ikur në shtëpi, dhe jo të bëjë korrupsion për të blerë një makinë.
Të gjithë këta policë të mirë i njollos politika e keqa. Ajo politikë që është shumë më perverse sesa një efektiv që tregon allatet në internet e ngacmon studente në fakultet. Sepse është krijuar perceptimi se polici i keq është polic i mirë… Është ai shefi i madh që nuk pret ditën për të tërhequr pagën e cunguar nga overdrafti i radhës, por ka të fshehura llogari bankare në emër të të tjerëve. Është ai shefi që rri e bën pazare me bosët e pushtetit.
Kur perversiteti është virtyt në politikë, gjithnjë do gjenden edhe policë që “imitojnë” pushtetarët, ndaj në pyllin e madh do gjenden “derra” të tillë, dhe jo vetëm “barkderra” që po i degdisin në skuta vetëm për të mos prishur finesën e imazhit të Rilindjes.
