Nga Boldnews.al
Kryeministri Edi Rama, i akuzuar nga opozita se qëndron pas lehtësimit të dënimit për Dritan Dajtin, zgjodhi të reagonte nga Rrësheni, me një mënyrë populiste, por aspak realiste: “Besoj se do ta zhbëjmë atë vendim!”
Rama reagoi nga një takim me qytetarët e Rrëshenit të Martën, 5 ditë pasi Gjykata për Krime të Rënda pranoi gjykimin e shkurtuar për vrasësin e 4 policëve, duke i zbutur në këtë mënyrë burgimin e përjetshëm të marrë nga shkalla e parë.
Zbutja e dënimit për Dritan Dajtin shkaktoi reagim të fuqishëm publik, aq sa detyroi qeverinë, fillimisht me ministrat Etilda Gjonaj e Sandër Lleshaj, e, së fundmi me vetë kryeministrin, që të nisnin një furi sulmesh ndaj pesëshes së gjyqtarëve që morën atë vendim.
Por ky reagim agresiv qeveritar vjen më shumë pas akuzave të opozitës për lidhjet e Edi Ramës me Dritan Dajtin. Prej disa vitesh, eksponentë kryesorë të opozitës kanë ngritur dyshime për komunikime mes Ramës dhe Dritan Dajtit. Madje, flitet edhe për biseda telefonike, njëri nga posti i kryeministrit e tjetri nga qelitë e paraburgimit.
Pikërisht, për të hedhur poshtë këto akuza, Rama zgjodhi një takim ku rrëshenasit do të tregonin hallet e tyre, për të mbajtur një fjalim të gjatë e të rrëmbyeshëm kundër gjyqtarëve. Të pranishmit në takim, militantë të Partisë Socialiste, harruan për minuta të tëra problemet e tyre të jetesës dhe u habitën se si kryetari i tyre lëshoi përroin e akuzave për gjyqtarët.
Kryeministri u premtoi rrëshenasve të pranishëm se Ai do të zhbëjë vendimin e gjykatës. Por, natyrisht, ai nuk u tregoi se si do të arrinte ta realizonte këtë “premtim”. Me pozat e “kryegjyqtarit”, post që ia ka siguruar prej kohësh Reforma në Drejtësi, Rama deklaroi se do të vinte drejtësinë në vend.
Por, në fakt, qëndrimi i tij është thjeshtë dhe vetëm një populizëm, i treguar përballë banorëve të qytetit verior, për të cilët kryefjala e përditshmërisë së tyre është varfëria ekstreme.
Kryeministri nuk ka asnjë mjet ligjor në dorë për të ndryshuar vendimet e gjykatës. Ai, po, ka në dorë levat e Vetingut, të cilët mund t’i përdorë kundër gjyqtarëve, por jo kundër vendimit të tyre.
E, nëse merren të mirëqena akuzat e opozitës për lidhjet e tij me Dritan Dajtin, ai, jo vetëm nuk ka mundësi, por nuk do të kishte as dëshirë për të ndryshuar ai vendim.
Dritan Dajti, i akuzuar për vrasjen e 4 policëve në një përplasje me armë në vitin 2009, në plazhin e Durrësit, u dënua nga Gjykata për Krime të Rënda javën e kaluar me burgim të përjetshëm. Por, gjykata i pranoi atij gjykimin e shkurtuar e, në këtë mënyrë, dënimi iu konvertua në 25 vjet burgim.
