Drejtuesi i Prokurorisë së Krimeve të Rënda, Artan Bajrami, u përball sot në një seancë me Komisionin e Pavarur të Kualifikimit.
Lidhur me dy nga kriteret e vlerësimit, pastërtinë e figurës dhe aftësitë profesionale, Bajrami rezultoi pa problem, ndërkohë që në kriterin e 3-të, atë të pasurisë, u ngritën dyshime lidhur me një apartament në Tiranë, si dhe një automjet.
DSIK ka dorëzuar një raport me konstatimin se subjekti është i përshtatshëm për vazhdimin e detyrës.
Sipas raportit, prokurori ka plotësuar saktë formularin dhe nuk ka indicie që ka lidhje me persona të krimit të organizuar.
Po kështu për aftësitë profesionale, rezulton se Bajrami ka treguar aftësi në punë, korrektësi në zbatimin e ligjit. Gjithashtu nuk ka asnjë denoncim nga qytetarët për Bajramin.
Në lidhje me kriterin e pasurisë ILDKPKI, ka dorëzuar një raport me konstatimin se, deklarimi është i saktë dhe në përputhje me ligjin. Ka burime financiare të ligjshme. Nuk ka kryer deklarim të rremë dhe nuk ka fshehur pasurinë.
KPK ka kryer një hetim të thelluar për pasuritë: apartament 110 metra katrorë në Tiranë, blerë për 45 mijë dollarë ose 6.5 milionë lekë.
Si burim është deklaruar një hua prej 5 milionë lekë dhe të ardhurat nga shitja e banesës në Gramsh për 4 mijë dollarë, si dhe kursimet nga paga.
Nga hetimi ka konstatuar mospërputhje ne deklarim për shlyerjen e një kësti të huasë. Gjatë hetimit, subjekti nuk ka deklaruar se pagesa 1.5 milionë lekë është paguar nga baxhanaku, siç ka bërë më herët. Prokurori ka deklaruar se kontributi i tij për apartamentin është vetëm huaja e marrë, e cila vërtetohet. Nga hetimi i kryer, baxhanaku ka paguar rreth 2.2 milionë lekë, por ka burime të ligjshme.
Apartament banimi në Golem, 55 metra katrore , subjektit iu kërkua shpjegime në lidhje me disa pasaktësi për këtë apartament. Pasuri e paluajtshme pyll dhe kullot, 910 mijë metra katrorë përfituar nga komisioni i kthimit të pronave, subjekti e ka deklaruar si trashëgimi nga babai. Për herë të parë e ka deklaruar në vitin 2014. Rezulton se përputhet deklarimi me dokumentet e tjera. Gjithashtu, rezulton se subjekti nuk e ka deklaruar asnjëherë më parë se viti 2014. Subjekti ka dhënë shpjegime në lidhje me këtë konstatim, që do të merren parasysh, shkruan Panorama.
Pasuritë e familjes, llogaria e pagës, që përputhet me dokumentacionin. Apartament 95 metra katrorë e vajzës blerë për 9.8 milionë lekë. Burim krijim është deklaruar kursimet familjare 20 mijë euro, kursimet nga vajza në shumën prej 12 mijë lekë. Hua prej 20 mijë euro nga një person tjetër. Nga hetimi në lidhje me burimin e huasë, ka konstatuar se shtetasi ka pasur mundësi financiare të dhurojë këtë shumë. Gjendje e llogarisë për pagën e vajzës, është konstatuar se përputhet deklarimi. Makinë audi, blerë për 5 mijë euro më 2014.
Nga verifikimi, vërehet se deklarimi është i saktë dhe se kanë burime të ligjshme për krijimin e kësaj pasurie. Bajrami ka deklaruar se ka përdorur makinën e një agjencie, që është përdorur për udhëtimet jashtë vendit. Nga hetimi i kryer, rezulton ndonjëherë emri i tij në polica dhe i djalit si pronarë.
Ka dyshime se ai mund të jetë pronar i këtij mjeti, pasi është përdorur edhe brenda vendit.
