Dy gola në tri ndeshje janë statistikë e mirë për një sulmues. Për një mbrojtës, duke përmendur se goli i fundit i jep 3 pikë jetike ekipit, është fantastike. Albi Doka është kritikuar shumë. Shpesh edhe gabimisht e pa të drejtë, por me kalimin e kohës po bën gjithkënd që t’i përtypë fjalët.

“Kameleoni vrasës tregon sekretet e formës së tij dhe të kthesës së madhe të Tiranës, festën dhe raportin me tifozët, kritikun dhe mbështetësin më të madh personal, dedikimet speciale sa herë shënon dhe ëndrrën apo frikën më të madhe në jetë. Mbrojtësi bardheblu ka edhe një bindje personale, apo premtim për mbështetësit e Kukësit: Do gëzojnë kur të mundim edhe Partizanin… tregon ndër të tjera 21- vjeçari i skuadrës bardheblu.

Shënuat një gol me shumë peshë. Çfarë ndjesie ishte për ju në ato momente?

Normalisht që ishte një kënaqësie shumë e madhe. Është një ndjesi e shumë e veçantë të shënosh me fanellën e Tiranës. Ishte një gol që na ndihmoi shumë dhe fatmirësisht na dha fitoren, ç’është edhe më e rëndësishmja. Megjithatë, duhet të qëndrojmë me ‘këmbë në tokë’, sepse Tirana duhet t’i fitojë të gjitha ndeshjet. E ka detyrim, sepse është Tirana.

Meqenëse shënoni rrallë, a keni një dedikim për golin ndaj Kukësit?

Të gjithë golat që shënoj ia dedikoj vetëm Zotit.

Jashtë Tiranës, me kë është tifoz Albi?

Me Kristiano Ronaldon (qesh…). Më saktë kam qenë me Realin po tashmë që ka shkuar te Juventus nuk është se kam ndonjë ekip shumë të preferuar. Për Juven momentalisht kam simpati për shkak se Ronaldo është aty.

Kur do e fitoni një derbi?

Kam shumë besim te çunat dhe them se ky i radhës do të jetë derbi ynë.

Po të ishte në dorën tuaj për ta vendosur, kujt do t’ia jepnit titullin këtë vit?

Kukësit!

Pasi e mundët Kukësin, u tha se Tirana indirekt ndihmoi edhe Partizanin për titullin… A keni një koment për këtë?

Jo, nuk e kemi ndihmuar fare. Në bëmë detyrën tonë dhe e menduam ndeshjen siç po bëjmë duke i marrë me radhë, një nga një. Edhe Kukësi do kënaqet kur ne do të mundim edhe Partizanin në derbi./Boldnews.al/