Nga Boldnews.al
Gjykata për Krime të Rënda i kërkon Prokurorisë që të mbyllë hetimin ndaj Saimir Tahirit deri në 10 mars 2019, duke refuzuar në këtë mënyrë zgjatjen e hetimeve për 3 muaj të tjerë.
Në janar 2019, prokurorët e çështjes “Tahiri” kërkuan për të pestën herë zgjatjen e hetimeve me 3 muaj ndaj ish-ministrit të Brendshëm, të dyshuar si bashkëpunëtor i narkotrafikantëve Habilaj.
Por, gjykata, pas kërkesës së Tahirit, nuk e pranoi këtë zgjatje, duke kërkuar nga Prokuroria për Krime të Rënda që të mbyllë hetimin deri në 10 ditëshin e parë të marsit.
Në këtë mënyrë, prokurorët kanë kohë edhe një muaj për të vendosur nëse do të pushojnë hetimet apo do të vendosin për dërgimin e tij në gjyq, ku do të akuzohet për “pjesëmarrje në grup të strukturuar kriminal” dhe “shpërdorim detyre”.
Saimir Tahiri është zyrtari më i lartë shqiptar i hetuar për përshirje në trafik narkotikësh në Shqipëri. Por, hetimi që nisi me vrull, u zbeh shumë pas ndryshimeve në stafin drejtues të Prokurorisë.
Fillimisht, Prokuroria për Krime të Rënda kërkoi, në Tetor 2017, autorizimin nga Parlamenti për arrestimin e deputetit Saimir Tahiri. Kjo kërkesë u rrëzua me votë politike nga ana e Partisë Socialiste.
Më tej, me ardhjen e Arta Markut në krye të Prokurorisë së Përgjithshme, nisën lëvizjet e para për zbutjen e pozitës penale të ish-ministrit të Brendshm. Gjithësesi, në Maj 2018, Prokuroria për Krime të Rënda, e cila vijonte të ishte “oaz” i pavarur nga Arta Marku, kërkoi në gjykatë arrestimin e Tahirit, i cili në atë kohë kishte dhënë dorëheqjen nga funksioni i deputetit.
Gjykata për Krime të Rënda vendosi ndaj Tahirit masën e sigurisë “arrest në shtëpi”, e cila u rrëzua vetëm dy javë më pas nga Apeli i Krimeve të Rënda. Pas këtij zhvillimi, Kryeprokurorja e Përkohshme, Arta Marku, ndryshon titullarin e prokurorisë për Krime të Rënda.
E, që prej asaj kohe, hetimi ndaj Tahirit është zvarritur deri në atë pikë sa, gjykata urdhëron që prokuroria të mbyllë veprimet e saj. Tashmë, prokurorët duhet që deri në 10 mars të vendosin nëse Saimir Tahiri duhet të përballet me akuzat në gjykatë apo të jetë i lirë për të vijuar jetën e tij i qetë.
