Precedenti “Dritan Dajti”/ Pse nuk “mjaulliu” Rilindja kur u lirua miku i Gjushit?

Dy ministra të qeverisë “Rama” prishën pushimin e së Dielës për të reaguar ndaj gjyqtarëve që rrëzuan burgimin e përjetshëm të dhënë më parë ndaj Dritan Dajtit, i akuzuar për vrasjen e 4 policëve në Durrës, në një episod të rëndë të verës së vitit 2009.

Ministrja e Drejtësisë, Etilda Gjonaj, e para dhe më tej Ministri i Brendshëm, Sandër Lleshaj, kërcënuan me hetim, shkarkim dhe burgosje pesëshen e gjyqtarëve që vendosën për dënimin me 25 vjet burgim të Dajtit.

Në fakt, reagimi formal, edhe pse i vonuar, shkonte në të njëjtën gjatësi vale me qëndrimin e opinionit publik mbi këtë rast. Pra, ministrat e Ramës u investuan ditën e pushimit zyrtar, me qëllimin që reagimi i tyre të zinte vend mirë tek qytetarët.

Por, në një tjetër rast, të rëndë gjithashtu, kur në vitin 2016 u lirua Astrit Avdyli, i dënuar për “vrasje me paramendim”, zyrtarët e “Rilindjes” nuk lëshuan asnjë “mjaullimë” të vetme.

Astrit Avdyli, i konsideruar si një prej drejtuesve të grupit “Avdulaj” të Shijakut u arrestua në Tetor 2018, për pjesëmarrje në organizatë kriminale. Emri i tij u mediatizua shumë, sidomos pas shprehjes që deklaroi në seancën gjyqësore se “Vangjush Dakon e kam mik, tek ai i qaj hallet. Rroftë Partia Socialiste…”.

Astrit Avdyli kishte pak kohë që kishte dalë nga burgu, kur u arrestua në kuadër të operacionit “Vol-vo4”.

Ai ishte arrestuar në vitin 2013, si i akuzuar dhe i dënuar me 16 vjet burgim për një vrasje të ndodhur në vitin 1997. Tre vjet pas arrestimit, në vitin 2006, ai kërkoi lirimin nga burgu, me pretendimin se kishte probleme të theksuara shëndetësore (Depresion Endogjen me tentativa suicidale (Vetëvrasje).

LEXO EDHE  KLP përzgjedh prokurorët e SPAK, ja kur do të jetë gati lista

Kjo kërkesë e tij kaloi në disa shkallë gjyqësore dhe, në fund, në Mars 2016, Gjykata e Lartë vendosi përfundimisht që ai duhej të lirohej nga burgu.

Në vendimin nr. 31/2016, trupa gjykuese e Gjykatës së Lartë, në argumentat pro lirimit, shpjegonte: “…vlerëson se lirimi i të dënuarit për shkak se i rrezikohet jeta, do t’i mundësojë atij aksesin në trajtim mjekësor të përshtatshëm që do të ndikonte në uljen e rrezikut që i kanoset jetës së këtij të dënuari, prandaj është e nevojshme ndjekja në rrugë ambulatore e gjendjes shëndetësore të kërkuesit Astrit Avdyli në përputhje me ligjin dhe aktet përkatëse dhe nënligjore për shëndetin mendor në Republikën e Shqipërisë…”

Pas këtij vendimi, Astrit Avdyli doli në liri dhe, siç rezulton nga përgjimet e publikuara në media, pjesë e dosjes “339”, ai dhe personat e rrethit të tij janë angazhuar fuqishëm për mbledhjen e votave për Partinë Socialiste.

Ministri i Brendshëm i asaj kohe, Saimir Tahiri, i cili i dërgonte në mënyrë periodike Presidentit të Republikës dhe medias, lista emërore me gjyqtarë e prokurorë “të korruptuar, të paaftë e që rrëzojnë punën e Policisë së Shtetit…”, nuk e gjeti kohën për të reaguar kundër anëtarëve të Gjykatës së Lartë që mundësuan lirimin e Astrit Avdylit. Nuk reaguan as zyrtarë të tjerë, përfshirë edhe Kryeministrin Edi Rama, i cili në atë kohë e kishte sportin e tij të preferuar anatemimin e gjyqtarëve dhe prokurorëve.

“Rilindja” qëndroi në heshtje totale për këtë rast, me sa duket, për faktin se ai do të investohej në mbledhjen e votave për socialistët, siç rezultoi më pas në përgjimet e dosjes së famshme “339”. /boldnews.al/