Kryeministrin Edi Rama duket se nuk e mbajnë nervat kur qytetarët komentojnë në profilin e tij në rrjet, duke shprehur mendime të kundërta me atë të Kreut të Qeverisë.
Kështu një komentues ka thumbuar Ramën lidhur me Dritan Dajtin, autorin e vrasjes së 4 oficerëve të policisë, që i shpëtoi burgimit të përjetshëm dhe u dënua nga gjykata me 25 vite burg.
Vendimi i gjykatës ka sjellë reagime të shumta, ndërsa një qytetar shkruan në profilin e Ramës: “Të fala Dritan Dajtit! Hahah del krimineli për vrasje të katërfishtë nga burgu dhe ti thua qëe s’kam timonin e drejtësisë. Hahahah për çfarë erdhe në pushtet apo për të bërë llaç edhe tulla?”.
Por reagimi i Kryeministrit ka qenë i menjëhershëm.
“Mos u zgërdhi shumë se na keput ndonjë nerv e të mbetet goja kantato! Timonin e drejtësisë ky sistem i’a jep pushtetit gjyqësor dhe i’a ndalon me Kushtetutë e me ligj qeverisë, që ta marresh vesh zotrote, ndërsa qeveria dhe une kemi ndërmarrë reformën më të thellë të drejtësisë, pikërisht që të pastrohet sistemi nga fundërrinat që e morën peng 30 vjet. Ky proces ka nisur dhe do kërkojë mundimin e kohën e vet, kështu që fute gjuhën brenda dhe mblidhi buzët e shqyera vesh me vesh, se shtetbërja s’është llaf goje”, shkruan Rama në përgjigjen e tij.
