Policia ka proceduar penalisht administratorin e një ekipi futbolli të Superligës pasi ka lejuar në fanellat e ekipit një reklamë bastesh. Sipas të dhënave zyrtare, specialistët e Seksionit për Krimin Ekonomik e Financiar në Sektorin për Krimin Ekonomik e Financiar në Drejtorinë Vendore të Policise Tiranë proceduan penalisht shtetasin G.V., 30 vjec, banues ne Krujë, administrator i një ekipi futbolli të Superligës.
“Në datën 09.02.2019 në stadiumin “Selman Stermasi”, gjatë zhvillimit të ndeshjes së superligës është konstatuar se në fanellat e lojtarëve të ekipit që ky shtetas është administrator ka pasur logo reklamuese të një shoqërie bastesh sportive, në kundërshtim me ligjin nr.75/2018. Gjithashtu po kryhen verifikime për veprën penale të “Shpërdorimit të detyrës“ parashikuar nga neni 248 i Kodit Penal edhe për vëzhguesin e Federatës Shqiptare të Fubollit prezent në këtë ndeshje i cili ka lejuar që futbollistët të futen dhe të luajnë ndeshjen duke pasur të reklamuar në fanella këtë logo të kompanisë së basteve”-thuhet në reagimin zyrtar. Materialet i kanë kaluan Prokurorisë së Tiranës për hetime të mëtejshme. Ndonëse në njoftim është “ruajtur” emri i klubit, mësohet se bëhet fjalë për ekipin e Kastritit të Krujës.
Kryeministri Edi Rama u angazhua vetë në një fushatë që sipas tij do largonte qytetarët nga vesi. Por kjo u duk më shumë një fushatë, pasi bastet po vijojnë të vihen lehtësisht në disa site online, madje klubi superligës reklamon këto baste.
Nga 1 janari i këtij viti hyri në fuqi ligji që ndalon aktivitetin e basteve sportive dhe të kazinove, por një klub futbolli në “elitën” e kampionatit vijoi të reklamojë një kompani bastesh kineze.
