Kryeministri Edi Rama i ka drejtuar një premtim mbështetësve të Partisë Socialiste për të rikthyer bashkinë e Pogradecit në drejtimin e tyre.
Në zgjedhjet vendore të 2015-ës, Pogradeci ishte një nga qytetet surprizë, pasi mbështeti kandidatin e propozuar nga PD, ndërsa përballë tij kandidonte një emër i propozuar nga LSI, e cila ndodhej në atë kohë në koalicion me socialistët.
“I siguroj të gjithë ata që na ndjekin këtu e që janë qytetarë të kësaj zone, të Pogradecit, se përndryshe nga sa mund të duket për shkak se ne nuk kemi edhe drejtimin e Bashkisë së Pogradecit, kemi qenë e jemi shumë të vëmendshëm dhe shumë të angazhuar që, jo vetëm kjo zonë e bekuar të mos mbetet mbrapa, por përkundrazi dhe rruga e hyrjes në Pogradec është vetëm një shprehje e këtij angazhimi, ndërkohë që të gjitha këto projekte presin edhe fundin e qershorit për të marrë dhe atë si të thuash fuqinë e domosdoshme ekzekutive të një sinergjie të re, mes qeverisë dhe pushtetit vendor”, tha Rama.
