Kryeministri Edi Rama ka zhvilluar disa takime në qarkun e Korçës, ku duket se ka nisur edhe fushatën për zgjedhjet vendore të 30 qershorit 2019.
Ndonëse zyrtarisht socialistët nuk kanë përcaktuar emrat e kandidatëve apo slloganin e fushatës, duket se detajet po zbulohen nga dita në ditë nga përfaqësues të vetë socialistëve.
Kështu mësohet se për Bashkinë e Korçës, PS do të rikandidojë kryebashkiakun aktual, Sotiraq Filo, ndërsa në Elbasan ka siguruar kandidimin, Gledian Llatja.
E ndërkohë duket se me përcaktimin e emrave për 61 bashkitë, socialistët e drejtuar nga Rama kanë gjetur edhe slloganin.
“Për bashkinë që duam”, duket se do të jetë slogani i PS-së, pothuajse i ngjashëm me atë të 2017-ës, kur socialistët përdorën gjatë fushatës për Shqipërinë që duam.
Gjithsesi mbetet për t’u parë se çfarë do të vendosë Asamblea Kombëtare e PS, qoftë për sloganin ashtu edhe për kandidaturat. /boldnews.al/
