Prokuroria e Durrësit ka nisur hetime edhe për veprimtarinë e Drejtorisë Arsimore Rajonale Kavajë dhe për drejtuesit e Shkollës “Rilindja”, ku ishte nxënëse e mitura që ra pre e abuzimit seksual.
Mësohet se vajza ka dëshmuar në gjykatën e Durrësit, lidhur me abuzimin. Sipas saj, stafi pedagogjik dinte rreth abuzimit ditë me parë, por nuk e kanë denoncuar në struktura të tjera shtetërore.
Gjithashtu, në dosjen që prokuroria depozitoi disa ditë më parë në Gjykatën e Durrësit për masat e sigurimit personal ndaj të akuzuarve, zbulohet se institucionet arsimore u informuan rreth ngjarjes disa ditë para se vajza të bënte denoncimin në Polici. Megjithatë, nuk është bërë kallëzim në polici nga ana e punonjësve të institucioni arsimor.
Shtatë adoleshentë u lanë nga gjykata nën masën e arrestit me burg disa ditë më parë. Sipas hetimeve të prokurorisë, ata akuzohen se nën shantazhin e publikimit të një videoje intime, kanë kryer marrëdhënie intime me vajzën.
