Prej një jave, disa studentë të Unionit Studentor Gjerman, të deleguar nga studentët e këtij unioni me qëndër në Hamburg, kanë ardhur në Shqipëri në shenjë solidariteti për të mbështetur protestën e drejtë studentore që studentët shqiptarë po vijojnë nga dhjetori.
Prej ditës së parë kur mbërritën, ata e bënë të ditur se gjatë këtyre ditëve të qëndrimit në Shqipëri do të takojmë studentë të ndryshëm dhe do të bëjmë një reportazh që gjithë studentët që ndodhen në Gjermani dhe më gjerë të shohin dhe të dëgjohet zëri i protestës së studentëve shqiptarë.
Ditën e djeshme, dy përfaqësues të këtij unioni kanë vizituar Universitetin e Shkodrës “Luigj Gurakuqi”. Pasi kanë vëzhguar ambjentet e universitetit dhe janë njohur me problematikat e studentëve kanë vendosur ta bëjnë pjesë të reportazhit të tyre këtë universitet.
Në universitetin e Shkodrës vazhdon bojkoti masiv i mësimit dhe deri tani, studentët e këtij universitetit kanë shërbyer si shembull i rezistencës për të gjithë studentët e tjerë.
