Edhe pse akoma nuk janë luajtur ndeshjet e javës së 21-të të Kategorisë Superiore, Federata Shqiptare e Futbollit ka zbardhur datat dhe oraret e javës së 22-të.
Janë 5 përballje mjaft interesante të cilat do të luhen në fundjavën e ardhshme. Në Durrës luhet një duel titulli ku “Djemtë e Detit” do të presin verilindorët e Kukësit në një përballje zjarri.
Kryesuesit e Partizanit do të vihen përballë një kundërshtari mjaft të fortë në shtëpinë e tyre, siç janë kurbinasit e Laçit, të cilët luajnë për një vend në kupat e Europës. Në Vlorë luhet një nga përballjet më të luftuara në vitet e fundit, Flamurtari i Ilir Dajës do të presë kampionët në fuqi, Skënderbeun, këtë sezon të dy ekipet ndodhen në pozicione ngjitur me njëri-tjetrin në tabelën e klasifikimit dhe i ndan vetëm një pikë diferencë.
Ndërsa Tirana ka përballë Luftëtarin, i cili kërkon që t’i largohet sa më shumë zonës së ftohtë. Ndeshje interesante është ajo e fundit të tabelës përballë Kastriotit dhe Kamzës.
Kategoria Superiore – Java 22
E premte, më 15 shkurt
Ora 18:00 | Teuta-Kukësi
E shtunë, më 16 shkurt
Ora 14:00 | Kamza-Kastrioti
Ora 17:00 | Tirana-Luftëtari
E diel, më 17 shkurt
Ora 14:00 | Laçi-Partizani
Ora 17:00 | Flamurtari-Skënderbeu
