Kryetarja e LSI-së Monika Kryemadhi është përplasur me ministren e Drejtësisë Etilda Gjonaj, gjatë seancës së sotme plenare.
Fillimisht, ishte Kryemadhi e cila akuzoi ministren Gjonaj se ka shantazhuar gjyqtarë dhe prokurorë, teksa kjo e fundit nuk ishte në seancë. Kryemadhi akuzoi gjithashtu se bashkëshorti i Gjonaj ka qenë i përfshirë në korrupsion dhe ka lidhje me persona të inkriminuar. Ndërsa ministrja i quajti shantazhe akuzat e Kryemadhit.
“Nuk po merrem sot me ministren e Drejtësisë sepse nuk qenka këtu në sallë. Por meqenëse ajo paska dëshirë shumë të madhe për të luftuar korrupsionin, po i bëj me dije asaj dhe kryetarit të Komisionit të Ligjeve, që shantazhet ndaj gjyqtarëve dhe prokurorëve quhen shkelje e ligjit. Dhe shumë shpejt do ta ketë të faktuar sesi ajo shantazhon gjyqtarët dhe prokurorët për të arrestuar punonjës të Ministrisë së Drejtësisë, se vetëm në këtë mënyrë do të largojë punonjësit nga Ministria, sepse me gjyq janë kthyer të gjithë në punë. Dhe gabimisht ka futur në listë edhe motrën e sekretares së përgjithshme të njeriut të saj, apo edhe shumë të tjerë bashkëshortë deputetësh këtu në sallë që janë të Partisë Socialiste. A e ka luftë personale të saj apo e ka nga budallallëku, unë për hir të së vërtetës nuk e kam sulmuar duke pasur parasysh që është kushërira e një lidhje familjare të Ilir Metës, për shkak të lidhjeve të mia familjare me të. Por po i bëj me dije që nuk ka asnjë lloj mënyre që mund ta mbrojë Ministren e Drejtësisë duke shantazhuar punonjësit e saj, sepse ajo mund ta dijë shumë mirë që korrupsionin e ka brenda në shtëpinë e saj, në familjen e saj, le ti tregojë shqiptarëve pse është pushuar disa herë burri i saj nga Drejtoria e Tatimeve. Le ti tregojë shqiptarëve cilat janë lidhjet e bashkëshortit të saj me Elvis Martinaj apo dhe me shumë pika të tjera të basteve. Dhe le tu tregojë shqiptarëve cila është lidhja e saj me pjesëtarë të qeverisë apo dhe me avokatët e saj që ka në Kosovë. Prandaj i them znj. Etilda Gjonaj që të jetë shumë e kujdesshme në telefonatat e saj apo dhe në mesazhet që ju çon gjyqtarëve dhe prokurorëve. Sepse vërtetë SPAK-u do të ngrihet shumë shpejt por të jetë e bindu që SPAK-u do ta fillojë me ata të cilët kanë tentuar që ta kapin atë. Sepse SPAK-u është i domosdoshëm për hapjen e negociatave në Shqipëri dhe po të mos hapen negociatat,Shqipëria do të shkojë mbrapa”, tha kryetarja e LSI-së.
Përgjigjja e Gjonajt erdhi disa orë më vonë, po përmes foltores së Kuvendit. Edhe këtë herë, teksa Gjonaj i përgjigjej akuzave, Kryemadhi nuk ndodhej në seancë.
Ajo tha akuzat ishin “në formën e drejtpërdrejtë në një shantazhi, shpife dhe trillime”.
“Ndihem e keqardhur dhe është e turpshme që flitet për të disatën here për bashkëshortin dhe familjen time. Është e turpshme që në këtë sallë parlamenti ndodhin sulme dhe shantazhe të nivelin personal dhe familjar. S’jemi këtu për lidhje farefisnore. Bashkëshorti im ka qenë inspektor kontrolli në Drejtorinë e Tatimeve të Tiranës për 10 vite. Është larguar nga shërbimi civil me një vendim administrativ, por që ka ndjekur rrugën ligjore dhe është kthyer me vendim të formës së prerë në pozicionin që ka pasur, si inspektor. S’ka pasur asnjëherë një akuzë për korruprison dhe s’është larguar nga detyra për këtë shkak. S’ka lidhje as me bandat dhe as me lojrat e fatit apo subjekte që janë në hetim. Por përdorimi për shatazh totalisht e pranueshëm. Jam e hapur për çdo debat që ka fakte, për mënyrën se si unë e kam ushtruar detyrën nga momenti i ditës së parë dhe deri më sot. S’kam ndikuar as të prokuroria, as te gjykata, jo vetëm për mungesës e legjitimimit që kam, por edhe për këtë çështje të edhe natyrës sime”, tha Gjonaj. /Boldnews.al/
