Kreu demokrat Lulzim Basha nga salla e Kuvendit ka deklaruar se qeveria tranzitore është e vetmja zgjidhje, e cila jo vetëm do të garantojë zgjedhje të lira dhe të ndershme, por do të krijojë mundësinë për hapjen e negociatave mes Shqipërisë dhe BE.
Basha shprehu bindjen e plotë se kjo qeveri tranzitore, pa pjesëmarrjen e Edi Ramës, do të realizohet dhe në këtë kuadër ftoi socialistët e ndershëm që të mbështesin një ide të tillë.
“I ftoj socialistët si kundërshtar politik, pasi qeveria tranzitore mbetet zgjidhja e vetme.
Për pesë kriteret kryesore të Komisionit jo vetëm që nuk ka progres, por ka regres. Ju kanë kapur në flagrancë duke bashkëpunuar me krimin për të ardhur në pushtet dhe mbajtur pushtetin, jeni damkosur si pengesa kryesore për integrimin e vendit, Zëri i Amerikës ju ka treguar jo vetëm sesi bëni rekrutimet në administratë, por edhe sesi keni vjedhur votat”, tha Basha.
Në vijim ai shtoi se zgjidhjen politikë nuk ua afronte kukullave të krimit.
“Nëse nuk arrihet me marrëveshje politike, po ju them, populli do vijë ta clirojë këtë sallë dhe institucionet, do t’i fshijë ministrat dhe deputetët e politikanët e lidhur me krimin, por nëse keni një fije ndërgjegje thirrini arsyes, kujtoni çfarë ju thanë në Berlin që të keni një shans sado të vogël, mos ta humbim përsëri hapjen e negociatave për herë të tretë.
Jua bëj këtë jo si kërcënim por si thirrje, atyre që e ndjenë këtë edhe pse janë kundërshtarët tanë, sepse nuk do i lini asnjë rrugë qytetarëve përveç se të marrin fatin e tyre në duar e tyre, të marrin institucionet e tyre në duart e tyre se në dorë të krimit, oligarkëve, hajdutëve nuk kanë për të qëndruar më çfarëdo të bëni e të thoni”, u shpreh Basha. /boldnews.al/
